Денис Коростиченко: "Бунёдкор"дан кучли эдик, ғалаба адолатли бўлди"

- Биринчидан, жамоамизни, мухлисларни ғалаба билан табриклайман. Ўйин жуда босимли бўлди. Шундай ўйин бўлишини кутгандик ва шунга яраша тайёрлангандик. Эхтимолий қўшимча бўлимларга ҳам тайёр эдик. Мураббийлар билан кўп жиҳатларни муҳокама қилдик. Ҳа, балки пенальтилардан ютгандирмиз, бироқ ғалабамиз адолатли бўлди дея оламан. Бундай ўйин билан ютишимиз шарт эди. Яна бир бор айтаман, "Бунёдкор" ҳам кучли ўйнади, охиригача курашди. Улар ҳам мақтовга лойиқ. Бундай ўйиндан кейин ҳиссиётлар ҳам тугаб қолади. Ичимдаги барча ғуборлар чиқиб кетди.

- Бугунги ўйин статистикасида "Локомотив" ҳам зарбалар, тўпни ушлаб туриш, умуман барча жиҳатлар бўйича рақибдан устунлик қилди. Гарчи ҳисоб 2:2 бўлган бўлса-да, ўйин бобида рақибдан устунлик қилдик, дея оласизми?

- "Бунёдкор" ҳам қаттиқ ҳаракат қилди. Фикримча, адолатли ютдик. Мен шундай кўрдим, биз рақибдан кучли ўйнадик.

- Мўмин Мелиевнинг туширилмаслиги, Жасур Жалолиддиновнинг захирада қолдирилиши, умуман шу каби жиҳатлар Сизнинг қарорингизми ёки бошқа сабаблар борми?

- Аввало бу менинг қарорим. Шунингдек, Мўмин Мелиевда кичик жароҳат бор, уни хавф остига қўймадик. 7 кундан кейин "Насаф" билан оғир ўйин бор, бизга ҳужумчи керак. Шу сабабли у бугун ўйнамади. Жасур Жалолиддиновнинг захирада қолдирилиши эса тактик юриш эди, иккинчи бўлимда у орқали ўйинни кучайтиришни ният қилгандик. Менимча у яхши ҳаракат қилди.

- Анваржон Алижоновнинг ўйинига қандай баҳо берасиз?

- Жуда яхши. Кўп меҳнат қилди. Бугун иккинчи марта асосий таркибда майдонга тушди. У ҳали жуда иқтидорли эканлигини кўрсатади.

- Пенальтилар сериясининг сўнгги зарбасини Жасур Жалолиддинов тепганига нима дейсиз? Ўтган ҳафтада у пенальтидан ура олмаганди.

- Матбуот анжуманида айтгандим, кейинги ўйинда пенальтини уради деб. Мана у урди ҳам (кулади).