Дебора Тюэр "Симоненко масаласи" "Бунёдкор" фойдасига ҳал бўлиши мумкинлигини айтди

Мазкур қарор бўйича биринчилардан бўлиб ахборот берган эдик. Хатда 2014 йил пойтахтликлар сафида фаолият олиб борган Сергей Симоненкога берилиши керак бўлган сумма ўз вақтида берилмагани қайд этилган бўлиб, бунга жазо сифатида 6 очколи санкция қўллаш лозимлиги айтилганди. 

Шундан сўнг "қалдирғочлар" раҳбари Мурод Алиев сайтимиз билан боғланиб, аслида пул ҳимоячининг ҳисоб рақамига тушганлигини айтиб ўтди. 

Куни кеча "Бунёдкор" вакиллари ФИФА тартиб-интизом қўмитаси раҳбари билан мулоқотда бўлдилар ва футболчига ажратилган сумманинг барчаси унинг "Ипотека" банкда очилган пластик карточкасига тушганини исботлаб беришди. Фақат ундаги пулларни ечиб олиш учун футболчининг ўзи Тошкентга келиши кераклиги, аммо бу ишни чўзиб юргани айтиб ўтилган. Вазият ойдинлашгач, Дебора Тюэр хоним барча ҳужжатлар ФИФАга юборилиши ҳамда 6 очколик санкция бекор қилинишини таъкидлаб ўтган. 

Биргина муаммо шундаки, 2014 йилда ишлаган раҳбариятнинг хатоси туфайли 15 % суммагина ФИФА қайд этган ҳисоб рақамига эмас, балки эски ҳисоб рақамга туширилган. Ундан ташқари ФИФА мазкур ишни кўриб чиққани учун 17 000 миқдордаги ҳисоб рақамини "Бунёдкор" клубига юборган. 

Демак, Симоненконинг ҳисоб рақамига тушган пуллар ҳақиқатдан ҳам банкда турганлиги тўғрисидаги ҳужжат ФИФАга тақдим этилса клуб ОЧЛ йўлланмаси учун курашишда давом этади, агар ПФЛнинг ўзи бу ишга қўл урмаса.