Coca Cola Суперлигаси. "Пахтакор" - АГМК ва 9-турнинг бошқа ўйинлари учун превью

Coca Cola Суперлига. 9-тур
12 июль, якшанба
АНДИЖОН – СУРХОН
Ҳакамлар: Аҳрол Рисқуллаев, Ришат Нугманов, Ҳасан Набиев, Тўрабек Суюнов
Назоратчи: Султон Зайлобиддинов
Комиссар: Лазиз Қўчқоров

Сўнгги учта турда уч марта дуранг ўйнаган "Андижон" олти турдан буён ғалаба нималигини билмаётган "Сурхон"ни қабул қилади. Термизликлар кетма-кет бешинчи ўйинни сафарда ўтказишади. Иккала клуб сафида тўпурар 3тадан гол урган. Термизликлар сафида Александр Касьян, андижонликлар сафида Жамшид Ҳасанов.

“Андижон” ва “Сурхон” жамоалари шу кунгача 26 маротаба ўзаро баҳс олиб борган. Ўтказилган 26 та учрашувнинг 15 тасида “Андижон” жамоаси ғолиб чиққан бўлса, “Сурхон” жамоаси 6 та учрашувда ғалаба қозонган. Қолган 5 та учрашув эса дуранг натижаси билан якунланган. Тўплар нисбати 56-33 “Андижон” жамоаси фойдасига. "Сурхон" Андижонда фақат бир марта ғалабага эришган (1994 йил), яъни термизликлар 26 йилдан буён сафарда бу жамоани мағлуб эта олишмаяпти.

МЕТАЛЛУРГ – СЎҒДИЁНА
Ҳакамлар: Виктор Серазитдинов, Абдуҳамидулло Расулов, Авазбек Абдуллаев, Абдурашид Худойберганов
Назоратчи: Бахтиёр Тоғаев
Комиссар: Сардор Қудратуллаев

Ўтган тур бу мавсум илк бор рақиб дарвозасига гол ура олмаган "Металлург" Бекободда сафардаги 4та ўйиннинг 1тасида ғалабага эришган "Сўғдиёна"ни меҳмон қилади. "Металлург"да 5та гол урган Станислав Андреев тўпурар бўлса, "Сўғдиёна" сафида 4та тўп киритган Шоҳруз Норхонов тўпурар ҳисобланади.

“Металлург” ва “Сўғдиёна” жамоалари бугунгача кучлилар сафида ўзаро 36 та ўйин ўтказишган. Шулардан 14 тасида бекободликлар, 15 тасида жиззахликлар ғалаба қозонишган. 7 та учрашувда эса дуранг натижа қайд этилган. Киритилган ва ўтказиб юборилган тўплар фарқи жиззахликлар фойдасига – 51:49.

13 июль, душанба
НАВБАҲОР – ҚИЗИЛҚУМ
Ҳакамлар: Жасур Мухторов, Руслан Серазитдинов, Далер Тиллоев, Достон Мирзараимов
Назоратчи: Андрей Клепиков
Комиссар: Рамиль Ильясов

Ўз майдонида 3та ўйиннинг барчасида ғалаба қозонган ва умуман гол ўтказмаган "Навбаҳор" Наманганда бу мавсум умуман ғалаба нашидасини сура олмаган "Қизилқум" билан куч синашади.

Мазкур клублар 40 марта ўзаро рўбарў бўлишган. Ушбу баҳсларда “Навбаҳор” 15 марта, навоийликлар эса 14 марта ғалаба нашидасини суришган, 11та учрашувда эса дуранг қайд этилган. Тўплар нисбати бўйича устунлик вакилларимиз томонида - 52–46. Ўзаро ўйинларда “лочинлар” 56, “Қизилқум” эса 53 очкони қўлга киритган. Ушбу клубларнинг Наманганда бўлиб ўтган 20та учрашувидан 10 тасида “лочинлар” зафар қучишган, 6та ўйинда эса дуранг натижа қайд этилган, 4та баҳсда навоийликлар ғалаба қозонишган.

ПАХТАКОР – АГМК
Ҳакамлар: Шерзод Қосимов, Алишер Усмонов, Санжар Шоюсупов, Рустам Чориев
Назоратчи: Владислав Цейтлин
Комиссар: Шоҳруҳ Саид

Бу мавсум ўз уйидаги 5та ўйинда 5та ғалабага эришган "Пахтакор" 2020 йилги Ўзбекистон чемпионатида умуман мағлуб бўлмаган ягона жамоа АГМКни қабул қилади. "Шерлар"нинг ғалабали серияси 4та ўйинга етди, АГМК эса 5та ўйиндан буён ғалаба қозониб келмоқда.

Бу икки жамоа чемпионатлар тарихида 24 учрашувда ўзаро ўйин ўтказишган. 18 беллашув "Шерлар" ғалабаси билан якунланган. 2 ўйин дуранг билан тугаган ва 4 бор АГМК муваффақиятга эришган. Тошкентда АГМК бир марта, 2013 йил 2:1 ҳисобида зафар қучган, яъни 7 йилдан буён олмалиқликлар бу рақибни сафарда мағлуб эта олишмаяпти. Ўз майдонида "Пахтакор" 9 ғалаба, 2 дуранг ва 1 мағлубиятни қайд этган.

14 июль, сешанба
ЛОКОМОТИВ – МАШЪАЛ
Ҳакамлар: Раҳимбек Каримов, Ҳусниддин Шодмонов, Дамир Искандеров, Адҳамжон Эргашев
Назоратчи: Маъмур Саидқосимов
Комиссар: Аҳмед Тиллаев

Охирги икки ўйинни ўз майдонида ўтказиб иккита ғалабага эришган "Локомотив" кетма-кет уч турдан буён сафарда ўйнаб уч марта мағлуб бўлган "Машъал"ни қабул қилади.

“Локомотив” ва “Машъал” жамоалари ички чемпионатимиз доирасида шу пайтга қадар 24 марта ўзаро тўқнаш келишган. Ўзаро ўйинлардаги устунлик – “Локомотив” футболчилари томонида. “Локомотив” ўтказилган беллашувларнинг 13 тасини ўз фойдасига ҳал эта олган. “Машъал” вакиллари эса 9 та ўйинда ғалабага эришишган. Икки бора эса жамоалар дуранг ўйнашган. “Локомотив” шу вақтгача “Машъал” дарвозасини ўзаро ўйинларда 33 марта ишғол этган. Ўз дарвозасидан эса 27 та гол ўтказиб юборган. "Газчилар” “темирйўлчилар”ни сўнгги бор 2010 йилнинг августида мағлуб этишган. Ўшанда “Машъал” ўйинчилари тошкентликларни 2:0 ҳисобида енгганди. Яъни 10 йилдан буён Муборак клуби "Локомотив"ни мағлуб эта олмай келмоқда.

ҚЎҚОН-1912 – НАСАФ
Ҳакамлар: Вадим Агишев, Расулжон Фозилов, Максим Нехочин, Ҳусан Музаффаров
Назоратчи: Марат Исмоилов
Комиссар: Муҳаммад Содиқ Содиқ-Охунов

Ўз уйидаги 5та ўйиннинг барчасида рақибларни мағлуб этган ва ўз дарвозасидан атиги битта гол ўтказиб юборган "Қўқон-1912" ўтган тур 4 ўйинлик ғалабасиз сериясига чек қўйган "Насаф"ни қабул қилади.

Бу жамоалар шу пайтга қадар чемпионат доирасида 22 марта тўқнаш келишган. “Насаф” ўйинларнинг 14 тасида зафар қучган, 5 та баҳсда қўқонликларнинг қўли баланд келган. Учта учрашувда дуранг натижа қайд этилган. Тўплар нисбати – 40-22, “Насаф” фойдасига. "Насаф" "Қўқон-1912" майдонидаги охирги учта ўйинда ғалаба қозона олмаган.

БУХОРО – БУНЁДКОР
Ҳакамлар: Равшан Абдувоҳидов, Зуфар Элибоев, Фарҳод Усмонов, Наим Қосимов
Назоратчи: Сардор Нажафалиев
Комиссар: Жаҳонгир Раҳматуллаев

2020 йилги Coca Cola Суперлигасида ғалаба қозона олмаган "Бухоро" бу тур 3та ўйиндан буён мағлубият нималигини билмай келаётган "Бунёдкор" билан беллашади.

Бу жамоалар ҳозирга қадар 26 бор ўзаро ўйин ўтказишган. Эътиборлиси, шу кунгача ўтказилган 19та баҳсда “қалдирғочлар” ғалаба қозонганлар. 6та учрашувда дуранг натижа қайд этилган. Бухороликлар ҳисобида биргина ғалаба бор. Тўплар фарқи – 62:14.