Coca Cola Суперлига биринчи давра якуни - энг қўпол ва энг тартибли клуб қайси?

Ортда қолган 13та тур давомида ҳакамлар футболчиларга жами 354 марта огоҳлантириш кўрсатишди. 13 бор футболчилар майдондан четлатилди.

Бу борада энг тартибли клуб "Насаф" бўлди. Рўзиқул Бердиев шогирдлари 13та турда жами 15 марта сариқ карточка олишди холос. Ундан кейинги ўринларни "Машъал" (21та сариқ), "Қўқон-1912" (24та сариқ) ва "Бухоро" (25та сариқ) эгаллашди. Мана шу тўрт клуб футболчилари биринчи даврада умуман қизил карточка олишмади.

Дастлабки даврада энг қўпол клуб сифатида "Сўғдиёна" қайд этилди. Жиззахликлар 13та ўйинда 31та сариқ ва 2та қизил карточка ишлаб олишди. Ундан кейинги поғонани "Навбаҳор" эгаллаб турибди - 30та сариқ ва 2та қизил. "Металлург" дастлабки даврада икки бор қизил карточка олган учинчи жамоа бўлди.

Энг кўп карточка олган футболчиларга келсак бу борада Бобуржон Акбаров ("Қўқон-1912"), Лутфулла Тўраев ("Бунёдкор") ва Евгений Чумак ("Металлург") "етакчи" бўлишди. Бу футболчилар биринчи даврада 5 мартадан огоҳлантириш олишди. "Навбаҳор" ярим ҳимоячиси Исломбек Исоқжонов эса 2 марта қизил карточка олиб бу борада антирекорд соҳибига айланди.

Сариқ карточкани энг кўп кўрсатган ҳакам Вадим Агишев бўлди. У 9та учрашувда футболчиларни жами 35 марта огоҳлантирди. Жасур Мухторов, Аҳрол Рисқуллаев, Виктор Серазитдинов ва Темур Тўхтасинов 29тадан сариқ карточка кўрсатишди. Энг кам сариқ карточкани 2та ўйинда ишлаган Элёр Турсунов кўрсатди - 7та.

Дастлабки даврада Илгиз Танташев 3 футболчини майдондан четлатиб бу борада ҳакамлар орасида биринчи ўринни эгаллади. Қизиғи Танташев фақатгина 4та ўйинда ишлади холос. Аҳрол Рисқуллаев, Азиз Асимов, Зокир Қодиров ва Шавкат Насибуллаев 2тадан қизил карточка кўрсатишди. 10 нафар ҳакам биринчи даврада умуман қизил карточкани ишга солишмади. Темур Тўхтасинов 8та учрашувда ишлаб биронта футболчини четлатгани йўқ.