"Бухоро": Аккредитация жараёни бошланди

Футбол мухлислари, жамоалар ва умуман футболга алоқадор ҳар бир шахс янги мавсумни интиқлик билан кутмоқда. Учрашувларни ёритиб борадиган ОАВ ҳам мавсум стартини интиқлик билан кутишмоқда. Футбол бу мамлакатимизда биринчи рақамли спорт тури саналади. Унинг тарғибот ва ташвиқотида оммавий ахборот воситалари ўрни жуда катта.

“Бухоро” жамоасининг уй учрашувларини кўплаб журналислар ёритиб боришларига ўрганиб қолганмиз. 2017 йилги мавсум давомида “Бухоро” жамоасининг уй учрашувларини ёритиб бориш учун ОАВ вакилларини аккредитациядан ўтказиш жараёни бошланганлигини маълум қиламиз.

Оммавий ахборот воситаларининг ўйинларни махсус секторда ёритиб бориш, журналистлар учун яратилган барча шароитлардан тўлақонли фойдаланишлари, учрашувлар якунида уюштириладиган матбуот анжуманларида бевосита иштирок этишлари, шунингдек, ТВ операторлари ҳамда фотомухбирларнинг бевосита майдон атрофида фаолият юритиш имконини берувчи махсус рухсатнома (бейджик)лар тақдим этилади.

Бунинг учун ОАВ:

1. Ўзи ишлаётган корхонадан “Бухоро” бош директори Нажмиддинов Амрилло Абдуллаевич номига хат (хатда аккредитация хужжати бериладиган ҳар бир ходимнинг тўлиқ исми шарифи, лавозими кўрсатилиши лозим).

2. 2 дона 3х4 ҳажмдаги фотосурат (электрон варианти тавсия этилади)

3. Паспорт нусхасини тақдим этишлари шарт.

Хужжатларни pfkbuxoro@mail.ru электрон почтасига ёки клубнинг ходимлар бўлимига тақдим этишларингиз мумкин бўлади.

Ҳужжатларни қабул қилиш 27 февралга қадар давом этади.

П.С: Янги мавсумдан эътиборан медиа трибунага кириш бейджиклари бўлмаган ҳар қандай шахсга тақиқланади!