1 июндан янги қоидалар кучга кирди

Масалан, энди ҳужум қилаётган жамоа вакиллари жарима зарбаси вақтида рақибнинг жонли деворига тура олмайди, мураббийларга эса сариқ ва қизил карточкалар кўрсатилади.

Ўйинга таъсир кўрсатган биринчи янги қоида - эркин зарба пайтида ўз жарима майдончаси ичида турган футболчига пас бериш мумкинлиги. Авваллари футболчилар тўпни у жарима майдончасини тарк этганидан сўнг қабул қилишарди - ҳозир эса ичида ҳам мумкин.

Янги қоидалар Копа Америкада кучга кирган. Ўйинларга яхшилаб эътибор беринг.

Ушбу услубда пас берилган баъзи ўйинларда футболчилар ҳакамга эътироз билдиришди, аммо рефери ҳаммаси жойида эканлигини айтиб, ўйинни давом эттирди. Ўйинчиларга янги қоидалар бўйича тушунтиришлар берилмаган кўринади.

Қизиқ ҳолат, УЕФА ҳозирча Миллатлар лигаси ва Евро-2020 саралашида қоидаларни ўзгартирмади. Европа футболининг мутасаддилари бунга қуйидагича изоҳ беришди:

"Қисқа вақт ичида қоидаларни ўрганишда чалкашликлар юзага келмаслиги ва баҳсли вазиятлар бўлмаслиги учун янги мавсум бошигача ушбу қоидалардан фойдаланмасликка қарор қилдик".

Ҳозирча УЕФА байроғи остидаги барча турнирлар эски қоидалар бўйича ўтказиляпти. Бироқ аёллар ўртасидаги жаҳон чемпионатида янги қоидалар амалда.

Ўзбекистон Суперлигасида янги қоидалар қачон қўлланилади дейсизми? Янги қоидалар 1 июндан кучга кирди, бу пайт эса Ўзбекистон чемпионатининг деярли ярми ўтиб бўлган эди. Шу сабабли турнир ўртасида тушунтириш ўтказиб, футболчиларни чалғитмаслик учун янги қоидалар келаси мавсумдан қўлланиладиган бўлди.