"Бунёдкор" вакиллари Вадим Абрамов бошчилигида Ўзбекистон Давлат жаҳон тиллари университетига ташриф буюришди

Кеча Тошкент шаҳридаги Сингапур менежментни ривожлантириш институтига ташриф буюриб, талабалар билан учрашув ўтказган жамоамизнинг навбатдаги манзили Ўзбекистон Давлат жаҳон тиллари университети бўлди. Худди Сингапур менежментни ривожлантириш институти сингари бу даргоҳ ҳам "Бунёдкор"га жуда яқин, деярли қўшни олийгоҳлардан бири десак муболаға бўлмайди.

Аввалгисидан фарқли равишда университетга ташрифимиз талабалар билан учрашув, ўзаро суҳбат ва савол-жавоблар билан якунига етди. Аммо талабаларнинг миллионлар ўйинига қизиқиши, ўзбек футболига бўлган эътибори, жонкуярлиги тадбирнинг чиройли ўтишини таъминлади.

Талабалар нафақат "Бунёдкор", балки ўзбек футболининг оғриқли нуқталарига оид саволлар билан мурожаат қилишди. Табиийки, барча саволларга батафсил ва қониқарли жавоб қайтарилди. Тадбир якунида университет раҳбариятига эсталик совғалари тақдим қилинди. Талабаларга эса, 31 март куни бўлиб ўтадиган Суперлига доирасидан ўрин олган "Бунёдкор" - "Пахтакор" ўйинига чипталар берилди. Қолаверса, университет футбол жамоаси билан ўртоқлик ўйини ўтказиш борасида ҳам келишувга эришилди.