“Бунёдкор” рақибларида нима гап?

Ўйин “Пахтакор” стадионида 17:00да бошланади. Орадан бир соат ўтиб Эронда гуруҳдаги иккинчи ўйин “Фулад” – “Ал Фатҳ” баҳси старт олади. Бунда қайд этиладиган натижа ҳам “қалдирғочлар” учун жуда муҳим.

Айни пайтда гуруҳдаги тўрттала жамоа ҳам 1 очкодан эга. Ким ғалаба қозонса, турнир жавалида юқорига кўтарилиб олади. “Ал Фатҳ” – Саудиянинг амалдаги чемпиони ҳисобланади. Лекин жамоа бу йилги мавсумда ўзини кўрсата олмаяпти. “Ал Фатҳ” 14та жамоа орасида 7-ўринда боряпти.

“Биз учун “Фулад” билан кечадиган баҳс жуда муҳим, - дейди саудияликлар устозиси Фатҳи Ал Жабал. – Ҳар икки жамоа ютишни хоҳлаяпти, демак бизда ҳам имкон бор. “Фулад” биринчи турда яхши таассурот қолдирди, биз уларнинг ўйини ҳақида маълум тасаввурга эгамиз. Таркибдаги барча футболчилар бу ўйинга тайёр. Сафимизда жароҳат олганлар йўқ”.

“Фулад” бош мураббийи Ҳоссейн Фараки клубни ажойиб тарзда бошқармоқда. “Фулад” Эрон чемпиони бўлишга жуда яқин турибди. Бугунги ўйинда майдон эгалари сафида ҳужумчи Араш Афшин туша олмайди.

“Менга маълум бўлишича, Саудия клуби биздан уч очко олмоқчи экан. Бундай ният яхши, лекин биз ҳам қараб турмоқчи эмасмиз. Ҳаммасини майдондаги ўйин кўрсатади. ОЧЛда ўйнаш борасида “Фулад” айтайлик, “Бунёдкор” сингари катта тажрибага эга эмас, бироқ биз ҳам ўзимизни кўрсатишни хоҳлаймиз”.