"Бунёдкор": ОФКнинг икки кунлик семинари якунланди

Унда 2016 йилги ОФК кубоги ва ОЧЛ мусобақасида иштирок этадиган клубларнинг менежерлари ва матбуот котиблари иштирок этишди. Маросимда “Бунёдкор” ФК номидан Исломжон Ходжаев (жамоа менежери) ва Баҳодир Мирзаев (матбуот котиби) қатнашишди.

Семинарнинг биринчи кунида асосан 2015 йилги мавсум таҳлили ва навбатдаги мусобақалар олдидан регламентда юз берган ўзгаришларга алоҳида тўхталиб ўтилди. Ўзгаришлардан кўпчиликнинг эътиборини тортган жиҳат сифатида, ОФК кубоги ва ОЧЛ мусобақаларининг мукофот жамғармалари икки баробарга оширилганлиги бўлди. Шунингдек, семинарнинг дастлабки кунида ҳар иккала мусобақанинг гуруҳ босқичи учун расмий қуръа маросими ўтказилди.

11 декабрь кунги илмий семинарнинг биринчи ярмида ҳам мусобақалар тартиб-қоидалари ҳақида тушунчалар берилди. Шифокорлар масаласига урғу қаратилди. Мухлислар билан ишлаш бўйича кўрсатмалар айтиб ўтилди. Тушликдан кейин эса клублар вакиллари “плей-офф” ва гуруҳдаги рақиблари учун ўз жамоаларини махсус слайдлар асосида таништиришди. Шундан сўнг ОФК маркетинг хизмати ходимлари клублар вакилларидан жамоаларнинг расмий либосларини белгиланган тартиб асосида қабул қилиб олишди.

Шу тариқа, 2016 йилги мавсум олдидан ОФК кубоги ва ОЧЛ мусобақалари иштирокчилари учун уюштирилган семинар якунланди.