"Бунёдкор": ОФК кубоги ва ОЧЛ турнири иштирокчи клублари семинари бошланди

Қитъамизнинг ҳар иккала нуфузли турнирида иштирок этувчи 80га яқин клуб вакиллари иштирок этаётган семинар Куала-Лумпурдаги муҳташам “Hilton” меҳмонхонасида ташкил этилган.

Семинар бошланишидан олдин клублар вакиллари ОФК масъуллари рўйхатдан ўтишди ва иштирокчилар учун аввалдан тайёрлаб қўйилган махсус бейжикларни қабул қилиб олишди.

Клублар вакилларини рўйхатга олишдан сўнг, маҳаллий вақт билан соат 10:00да ОФК клублар ўртасида мусобақалар ўтказиш бўлими бошлиғи Шин Мангил сўз олиб, мусобақа олдидан клубларга омад тилади ва семинарни тантанали равишда очиб берди. Шундан сўнг, ОФК масъуллари минбарга чиқиб, аввалдан режалаштирилган семинар маърузаларини ўқиб эшиттиришни бошладилар.

Маҳаллий вақт билан 14:30да (Тошкентда 11:30 бўлади) қура ташлаш маросими бошланади. Даставвал ОФК кубоги иштирокчилари ўз рақибларини билиб олишса, соат 16:30дан бошлаб Чемпионлар лигаси гуруҳ босқичидаги жамоалар ўз рақиблари номларини билиб олишади.