"Бунёдкор" "Бурирам"га қарши Нестеров ва Шораҳмедовсиз ўйнайди

Жанубий-шарқий Осиёга бўлган бу сафарги йўл қўшни Қозоғистон орқали амалга оширилди. Якшанба куни соат 12:00да "Бунёдкор" ФК делегациясини ўз бортига олган "Остона Эйр" авиакомпаниясига тегишли А-321 самолёти Тошкент халқаро аэропортидан Қозоғистонга қараб парвоз қилди. Сафарга отланган "қалдирғочлар" орасида тиззасидан олган жароҳати туфайли жамоанинг асосий посбони - Игнатий Нестеров ҳамда сариқ карточкалари сони иккитани ташкил этган Акмал Шораҳмедов йўқ эди.

Олма-Отага етиб келган бунёдкорчилар худди шаҳар номи билан бир хилда аталувчи меҳмонхонага жойлашишди. Отелдаги икки ярим соатлик ҳордиқдан сўнг Миржалол Қосимов ўз шогирдлари билан жамоатчиликка яхши таниш бўлган афсонавий "Динамо" стадионида машғулот ўтказди.

Машғулот якунлангач меҳмонхонада кечки овқат учун дастурхон ёзилди. Маҳаллий вақт билан соат 01:00да Олма-Отадан Бангкок томон парвоз давом эттирилади. Тошкентликлар Таиланд пойтахтига душанба куни тонгда етиб боришади. Бангкокдан эса яна ҳаво кемасида 410 км олисда бўлган Бурирам шаҳрига етиб борилади.

Эслатиб ўтамиз, Осиё Чемпионлар лигаси 1/8 финали биринчи учрашувлари доирасидаги “Бурирам Юнайтед” – “Бунёдкор” баҳси 14 май куни Тошкент вақти билан соат 16:00да бошланади.