“Бунёдкор-2001” Россиядаги турнирни ғалаба билан бошлади

“Рубин” футбол клуби ташаббуси билан ташкил этилаётган ушбу турнир жамоа сафида 2003-2007 йиллари тўп тепган, 2005-2007 йиллар мобайнида Россия ёшлар терма жамоаси сардори сифатида ҳаракат қилган, бу ёруғ оламни 22 ёшида тарк этган қозонлик Ленар Гильмуллин хотирасига бағишлаб ўтказилмоқда.

Турнирда жами 6та жамоа иштирок этмоқда. Булар: “Краснодар” (Россия), “Қайрат” (Қозоғистон), “Динамо” (Белорусь), “Бунёдкор” (Ўзбекистон), “Рубин” (Россия) ва “Зимбру” (Молдавия).

Мусобақанинг биринчи учрашувида “Бунёдкор” ва Минскнинг “Динамо” футбол мактаби тарбияланувчилари куч синашдилар. Қизиқарли кечган баҳсда ёш “қалдирғочлар” рақибни иродали тарзда 2:1 ҳисобида мағлубиятга учратдилар. Учрашувнинг 10-дақиқада Михаил Шевченко томонидан киритилган гол белоруссияликларни олдинга олиб чиққанди. Иккинчи бўлимда футболчиларимиз ташаббусни ўз қўлларига олишди ва “Динамо” дарвозасига иккита тўп киритишди. Голларга Хумоюн Исмоилов ва Сирожиддин Башриддинов муаллифлик қилишди.

“Бунёдкор-2001” футболчилари эртага 2-тур доирасида мусобақа мезбонлари “Рубин” жамоасига қарши саф тортишади. Учрашув Тошкент вақти билан соат 15:00да бошланади.