Бундеслига. Чемпионлик учун курашаётган "Лейпциг" ўз майдонида икки очко йўқотди (Батафсил шарҳ)
16 may 2020 21:44
News

Бундеслига. Чемпионлик учун курашаётган "Лейпциг" ўз майдонида икки очко йўқотди (Батафсил шарҳ)

Чемпионлик учун кураш олиб бораётган Юлиан Нагельсманн бошчилигидаги "Лейпциг" карантиндан кейинги дастлабки ўйинни ўз майдонида "Фрайбург"га қарши ўтказди.

Кўпчилик ўйиндан олдин мезбонларнинг ғалаба қозонишини тахмин қилганди, бошқа ҳар қандай натижа деярли сенсациядек қабул қилинарди. Якунда шундай ҳам бўлди.

Учрашувнинг 34-дақиқасида Грифо бурчакдан жарима майдонига узатди ва Гульде тўпни дарвозага йўллади - 0:1. "Фрайбург"нинг ўйиндаги биринчи аниқ зарбаси голга айланди.

Кейинги дақиқаларда "Лейпциг" ҳужумкорликни оширди ва ҳисобни тенглаштириш учун бир қатор имкониятларга эга бўлди. 77-дақиқада Кампльнинг чап қанотдан узатган тўпини Поульсен барчадан баланд сакраб боши билан дарвозани ишғол қилди - 1:1.

Нагельсманн шогирдлари энди ўз-ўзидан ғалаба учун ҳаракат қила бошлашди. Бироқ ҳакам томонидан қўшиб берилган дақиқаларда Кристиан Шртайх бошчилигидаги "Фрайбург" гол урди! Стандарт вазиятдан сўнг Гулачи дарвозаси иккинчи бор ишғол қилинди. Меҳмонлар ҳатто голни ва жуда яқин турган ғалабани нишонлашга ҳам улгуришди. Бироқ...вазиятга VAR аралашди ва оффсайд туфайли гол бекор қилинди.

Ушбу дурангдан сўнг "Лейпциг"нинг очколари 51тага етди. Бугун ғалаба қозонган "Дортмунд" улардан 3 очкога ўзиб кетишди, бироздан кейин ўйнайдиган "Мёнхенгладбах" ҳисобида ҳозирча 49 очко бор. Агар Франкфуртда "Айнтрахт" мағлуб этилса "Лейпциг" тўртинчи ўринга тушишга мажбур бўлади. "Фрайбург" ҳисобидаги очколар 37тага етди, айни пайтда жамоа 7-ўринда.

"Лейпциг" навбатдаги турни 24 май куни сафарда "Майнц"га қарши ўтказса, "Фрайбург" эса 23 майда ўз майдонида "Вердер"ни қабул қилади.

Ушбу баҳс ҳақида сайтимиз журналисти Шаҳбоз Беғамов қуйидаги фикрни билдирди: "Карантин "Лейпциг"га ёмон таъсир этгани сезилди ва "Фрайбург" жорий мавсум "Лейпциг" мағлуб этолмаган иккинчи жамоага айланди. Биринчи даврадаги баҳсда ҳам "Аугсбург" ишончли ўйнаган ва ғалабани тантана қилганди. Кристиан Штрайх жозибадор футбол тақдим этиш билан овора. Европа лигаси йўлланмасига лойиқ жамоа тузди.

РБ Лейпциг – Фрайбург 1:1 (0:1, 1:0)
«Ред Булл Арена Лейпциг»
Голлар: 0:1 – 34 Гульде, 1:1 – 77 Поульсен.
РБ Лейпциг – Гулачи, Мукиеле (Лукман, 46), Клостерманн, Хальстенберг, Анхелиньо, Нкунку (Шик, 81), Адамс (Забитцер, 69), Кампль, Лаймер, Вернер, Поульсен.
Фрайбург – Шволов, Кох, Гюнтер, Хайнц, Шмид (Шлоттербек, 90), Шаллаи (Хелер, 60), Хефлер, Гульде, Грифо (Вальдшмидт, 68), Линхарт, Петерсен (Хаберер, 68).
Огоҳлантиришлар: Шаллаи (24).