“Бундай “Бавария”га кўниколмайман»

“Мен жамоа билан бунгача олиб борган барча музокараларим очиқ ва самимий кечган. Ҳеч бир жиҳат четда қолмаган. Аммо ҳозирда ОАВда мен билан боғлиқ бир қатор масалалар муҳокама қилинмоқдаки, буларнинг аксарияти ёлғондан иборат. Бу мени асабимга тегмоқда. Мен бундай “Бавария”га ўрганманганман.

Мен формада эканман, кўпроқ майдонга тушишни истайман. Энг муҳими менга бўлган ишонч. Менга клуб томонидан беш йиллик шартнома таклиф қилинаётгани бу хомхаёл. Ҳозир 34 ёшдаман. 39 ёшда қандай ҳолатда бўлишимни билмайман. Шу сабаб ОАВларда бу ҳақда тарқатилаётган хабарларда ҳеч қандай мантиқ йўқ.

Мен учун доимо клуб раҳбарияти ва ишчи ходимларининг ишончи биринчи ўрин бўлиб келган. Мен ҳам дарвозабон ва жамоа сардори сифатида клубга содиқман”, дея Нойернинг сўзларидан иқтибос келтирмоқда Bild нашри.

Нойернинг мюнхенликлар билан амалдаги шартномаси 2021 йилнинг ёзида ниҳоясига етади. Жорий мавсумда футболчи “Бавария” сафида барча турнирларда 37 та учрашувда майдонга тушиб, ўз дарвозасидан 38 та тўп ўтказиб юборган. 15 та учрашувда эса ўз дарвозаси дахлсизлигини сақлаб қолган.