Бугун Тошкент дербиси. "Пахтакор" - "Локомотив"

Тошкент дербиси мақомига эга марказий ўйинни Равшан Эрматов бошчилигидаги ҳакамлар бригадаси бошқариб боради.

Олий лига. 24-тур.
"Пахтакор" - "Локомотив"
Бошланиш вақти - 18:30.

Турнир жадвалидаги ўрни: "Пахтакор" 6-ўринда (38 очко), "Локомотив" 1-ўринда (56 очко).
Очколар орасидаги фарқ - 18 очко.

Таъриф: Бу ўйинга ортиқча таърифнинг ҳожати бўлмаса керак. Бир сўз билан айтганда пойтахт дербиси. Амалдаги чемпион билан чемпионликка ҳаракат қилаётган жамоанинг ўзаро тўқнашуви. Бугун "Пахтакор" стадионида қизиқарли баҳс кечиши кутилмоқда. Иккала жамоа ҳам ўтган турни икки хил ўтказди. "Пахтакор" сафарда "Навбаҳор"ни мағлуб этиб қайтган бўлса, "Локомотив" ўз майдонида "Обод"ни енга олмади.  

Факт: Иккинчи даврада саккизта ўйинда майдонга тушган "Пахтакор" дастлаб кетма-кет тўрт учрашувда ғалаба қозона олмади. Кейинги тўртта ўйинда эса уч бор зафар қучиб, бир марта ютқазиб қўйди. Умуман олганда, жамоа ўз майдонида 11та учрашув ўтказиб, шундан саккизтасида ғалаба қозонган. Икки бор дуранг ўйнаб, бир марта мағлуб бўлган. "Пахтакор" ўз майдонида 10-тур баҳсида "Нефтчи"га 1:2 ҳисобида имкониятни бой берган.

Факт: "Локомотив" иккинчи даврада битта кам ўйин ўтказган. Чунки "Машъал" билан бўладиган учрашув октябрь ойига қолдирилган. "Локомотив" иккинчи даврада беш марта ғалаба қозонди ва икки бор дуранг қайд этди. Шу пайтгача 10та ўйинни сафарда ўтказган "теаирйўлчилар" шундан еттитасида ғолиб чиқишган. Уч бор дуранг ўйналган бўлса, "Локомотив" ҳали мағлуб бўлмаган.

Эслатма: "Локомотив" стадионида кечган биринчи давра беллашувида мезбонлар 1:0 ҳисобида ғғалабага эришишган. Ягона гол Темурхўжа Абдухолиқов томонидан киритилган. Кеча бўлиб ўтган Ёшлар лигаси баҳси эса 1:1 ҳисобида якун топди.