Бугун футбол. "Қўқон-1912" - "Нефтчи"

Бугун Қўқонда водий дербиси бўлиб ўтади. "Қўқон-1912" ўз майдонида Фарғонанинг "Нефтчи" клубини қабул қилади. Баҳс 18:30да бошланади.

Турнир жадвалида қўқонликлар рақибдан 10 очкога илгарилаб кетган ҳолда 8-ўринни эгаллаб туришибди. "Нефтчи" эса атиги тўрт очко жамғариб охирги ўринда бормоқда.

"Қўқон-1912" ҳозиргача уч бор ғалаба қозонган бўлиб, иккитаси уйда ва биттаси сафарда қўлга киритилди. Нўъмон Ҳасанов шогирдлари сафарда "Қизилқум", уйда эса "Навбаҳор" ва "Бунёдкор"дан устун келишди.

Биласизми? "Қўқон-1912" қаторасига етти ўйиндан бери ютқазмай келяпти. Жамоа икки бор зафар қучиб, беш марта дуранг ўйнади.

Факт: "Қўқон-1912" ўз уйида ҳали гол ўтказмаган ягона жамоа бўлиб турибди. Тўплар нисбати 2-0.

"Нефтчи"га келадиган бўлсак, бу жамоа сафарда тугул ҳатто уйдаги ўйинларда ҳам ғалаба қозонгани йўқ. Фарғоналиклар ортда қолган 10та турнинг тўрттасида дуранг ўйнаб, олти бор мағлубиятга учрашди. "Нефтчи"да тўплар нисбати ҳам жуда хунук кўринида 3-14 (-11).

Мухлислар "Нефтчи" қачон илк ғалабасини нишонларкин дея кутиш билан овора. Умуман олганда, ҳозирги "Нефтчи" жуда мушкул аҳволда. Жамоа ўтган йилги "Обод"га ўхшаб қоляпти.

Биласизми? "Нефтчи" охирги учта ўйиндан иккитасини дуранг билан якунлади.