Бугун футбол. "Нефтчи" - "Бунёдкор"

Суперлигада ўйнаш имконияти берилган "Нефтчи" ўз майдонида "Бунёдкор"ни қабул қилади. Соат 18:00да бошланадиган ўйинга қизиқиш катта. Ҳар иккала жамоа ҳам бугун ғалаба учун ўйнайди деб бемалол айтса бўлади.

Худди "Насаф" билан бўлгани каби "Нефтчи" бугун ҳам очиқ ва шиддатли ўйин намойиш этса керак. Ўз навбатида "Бунёдкор"нинг ҳам ҳужумкор футбол кўрсатишига шубҳа йўқ.

"Нефтчи" бунгача иккита ўйинда майдонга тушиб, иккаласида ҳам дуранг қайд этди. Қизиғи шундаки, "Нефтчи"нинг "Насаф" ва "Сўғдиёна"га қарши баҳслари 0:0 ҳисобида тугади. Жамоа ҳали гол ургани ва ўтказгани йўқ.

"Бунёдкор"га келсак, бугунги ўйин жамоанинг Суперлигада сафардаги илк учрашуви бўлади. Миржалол Қосимов шогирдлари аввалги иккита ўйинни уйда ўтказиб, бир дуранг ва бир ғалаба қайд этишди. АГМК билан 1:1 ўйнаган "Бунёдкор" кейинги турда "Пахтакор"ни 1:0 ҳисобида мағлуб этди.

Имкониятлар борасида устунлик "Бунёдкор" томонида дея оламиз. Чунки ўйин услуби томонлама меҳмонлар кучлироқ. Янгиланган "Нефтчи"да ўйин ҳозирча кучли эмас, бироқ уларнинг устунлиги мухлисларида эканини унутмайлик.