Бугун футбол. "Навбаҳор" - "Пахтакор"

Наманганда "Навбаҳор" "Пахтакор"га қарши баҳс олиб боради. Айтиш мумкинки, бу турнинг марказий ўйинларидан бири. Турнир жадвалида "Пахтакор" 12 очко билан етакчилик қилмоқда. Жамоа 4та ўйиннинг ҳаммасида ғалаба қозонган. 

"Навбаҳор" эса 4 учрашувдан сўнг 4 очко жамғарган ҳолда 8-ўринни эгаллаб турибди. Ҳозиргача ўз майдонида иккита учрашув ўтказган "Навбаҳор" бир мағлубият ва бир дуранг қайд этди. "Лочинлар" илк турда "Сўғдиёна"га имкониятни бой бериб қўйгач, Нўъмон Ҳасанов истеъфога чиқарилди. Охирги уч турдан бери жамоага Виктор Жалилов мураббийлик қилиб келаётганини жуда яхши биласиз. 

Виктор Романович қўл остида учта ўйин ўтказган "Навбаҳор" сафарда "Локо"ни мағлуб этиб, ўз майдонида "Насаф" билан дуранг ўйнади ва ўтган тур Олмалиқда АГМКга мағлуб бўлди. Кўриниб турибдики, наманганликлар янги мураббий бошчилигида фақат бир беллашувда зафар қучишди. 

"Пахтакор" эса айтиб ўтганимиздек, тўртта баҳснинг ҳаммасида ғалабага эришди. Питер Хюистра бош мураббий бўлганидан кейин "Пахтакор" янги мураббийнинг ўйин услубига кўникишга ҳаракат қиляпти. 

Албатта, бугун Марказий стадионда ҳеч бир жамоага осон бўлмайди. Қизиғи шундаки, ўтган тур АГМК "Навбаҳор" билан ўйнаб ОЧЛга жўнаб кетганди, бу тур эса "Пахтакор" "Навбаҳор"га қарши баҳсдан сўнг ОЧЛ гуруҳ баҳсларини ўтказиш учун Шаржага йўл олади.