Бугун футбол. "Насаф" - "Пахтакор"

Шубҳасиз, турнинг марказий баҳси бугун Қаршида бўлиб ўтади. Ўтган йил "Насаф" ўз майдонида "Пахтакор"ни 4:0 ҳисобида мағлуб этганди. Ўзиям жуда чиройли ўйин бўлганди. Мухлислар бу ўйинни ҳалигача унутгани йўқ. Бугун "Пахтакор" ўша мағлубият аламини олишга ҳаракат қилиб кўради.

Турнир жадвалида "Пахтакор" 20 очко билан пешқадамлик қилмоқда. "Насаф" ҳисобида эса 14 очко бор ва "аждарлар" кутилмаганда жадвалнинг 8-поғонасидан жой эгаллаб туришибди. Аммо бугунги баҳс моҳиятининг жамоалар эгаллаб турган ўрнига таъсири бўлмаса керак.

"Насаф" мавсумни яхши бошлади, шундай бўлдики жамоа қаторасига 8та ўйинда мағлуб бўлмади. Мана шу саккизта баҳсда уч ғалаба ва беш дуранг қайд этилди. Аммо охирги икки ўйинда "Насаф" кетма-кет ютқазиб қўйди. Аввалига ўз майдонида "Сўғдиёна"га, ундан кейин Тошкентда "Бунёдкор"га.

"Насаф"нинг айниқса "Сўғдиёна"га ютқазиб қўйиши жуда ғалати бўлди. Тўғри, Жиззахда мураббий алмашди, йигитларда бошқача кайфият пайдо бўлди, аммо "Насаф" ўз майдонида "Ал Садд"дек клубни мағлуб эта олганди, қандай қилиб "Сўғдиёна"дан мағлубиятга учради ҳайронмиз.

"Пахтакор" охирги турларга келиб ўз ўйинини топиб олгандек эди, бироқ охирги икки беллашувда дуранг қайд этди. "Шерлар" сафарда "Локомотив" ва уйда "Қўқон-1912" билан дурангга эришишди. Шунга қарамай, "Пахтакор" Супрерлига жамоалари орасида энг кам мағлуб бўлган учта жамоадан бири бўлиб турибди. Ҳозиргача "Пахтакор"дан ташқари "Насаф" ва "Қўқон-1912" икки мартадан имкониятни бой берган.

Биласизми? "Насаф" охирги тўрт ўйиндан бери ғалаба қозона олмаяпти: икки дуранг ва икки мағлубият.

Факт: "Пахтакор" ҳозирча сафарда тўртта ўйин ўтказиб, шундан фақат биттасида ғалаба қозонган. Жамоа 7-турда "Металлург"ни 5:0 ҳисобида мағлуб этиб қайтган.