Бу йил олий лигада сафарда энг узоқ мағлубиятсиз серияни давом эттирган жамоа қайси?

Куз келиб, совуқ тушгач жамоалар ҳам "жўжаларни санаш"ни бошлашади. Албатта, ҳозирча чемпион ким бўлишини айтиш мушкул. Аммо чемпионат охиригача олтин медаллар учун қизғин кураш кечса ажаб эмас. 

Шу ўринда рақамларга мурожаат қилган ҳолда ушбу мавсум сафар ўйинларида мағлубиятсиз серияни энг узоқ давом эттирган клубларни аниқладик. Кўпчилик ўйлаши мумкин, бу ҳойнаҳой "Локомотив" бўлса керак деб. Йўқ, "Локо" эмас экан. Сафар беллашувларида энг узоқ мағлубиятсиз серияни давом эттирган жамоа бу - "Қўқон-1912" бўлиб, қўқонликлар сафардаги олтинчи ўйинга келибгина мағлуб бўлишган. Жамоа Тошкентда "Бунёдкор"га 1:2 ҳисобида ўйинни бой берган. 

Бу борада иккинчи ўринни "Бунёдкор" эгаллаб турибди. "Қалдирғочлар"нинг сафардаги мағлубиятсиз серияси тўртинчи ўйинга келиб ўз интиҳосини топган. "Бунёдкор"ни ўз майдонида "Машъал" 1:0 ҳисобида мағлубиятга учратган. Учинчи ўрин эса "Динамо"га тегишли. Самарқандликлар сафардаги учинчи баҳсда биринчи мағлубиятни қабул қилиб олишган. "Динамо" 5-турда Қўқондан мағлубият билан қайтган. 

Олий лиганинг 9та клуби эса сафардаги биринчи ўйинидаёқ мағлуб бўлган. Булар - "Бухоро", "Қизилқум", "Металлург", "Шўртан", "Сўғдиёна", "Нефтчи", "Олмалиқ", "Обод" ва "Навбаҳор".