Брисбен матбуоти хитойлик дарвозабон қайтарган пенальтига катта эътибор қаратди

Бу ўйинда жуда қизиқ воқеа рўй берганидан аллақачон хабарингиз бўлса керак. Вазиятларнинг бирида бош ҳакам Хитой дарвозаси томон пенальти белгилади. Шунда хитойликлар посбони Ванг Далей орқасига ўгирилиб майдондан ташқарига чиқиб кетган тўпларни узатиб турувчи болакайдан қайси томонга сакрай деб сўради. 12 ёшли Стивен Уйат эса чап томонга сакра, ўша ёққа қараб тепади деди. Буни қарангки, саудиялик Наиф Ҳазази тўпни ўзидан ўнг томонга тепди ва дарвозабон зарбани қайтарди.

Ўйин охирларида эса Хитой битта гол уриб ғалаба қозониб кетди. Кейинчалик Ванг Далейнинг қандай қилиб пенальти қайтаргани ва орқасига ўгирилиб 12 ёшли болакай билан нималар ҳақида гаплашгани роса гап-сўз бўлди. Биз бу пайтда Сиднейда эдик ва кўп гапдан хабардор эмасдик. Брисбенга келганимиздан сўнг эса шаҳарда чоп этиладиган газеталар шу воқеага катта эътибор беришгани эътиборимизни тортди. Хусусан "The Courier Mail" нашри Стивен Уайтни салкам қаҳрамонга чиқариб қўйди. Кеча телевизорда ҳам намойиш этишди: журналистлар Стивеннинг уйига бориб ота-онасидан интервью олишибди.

"Мен реклама тўсиғи орқасида тургандим, - дейди болакай. - Дарвозабон ўгирилиб менга қаради ва тўпни қайси томонга тепади деб сўради. Мен чапга сакра дедим. Саудиялик футболчи тўпни чиндан ҳам мен айтган томонга тепди ва дарвозабон зарбани қайтарди. Ўйиндан кейин эса олдимга келиб мени табриклаб қўйди".

Брисбенда яшовчи Стивен Уайт эртаси кун ўтказилган Хитой терма жамоасининг машғулотига таклиф этилди. Унга Ванг Далей ўз формасини совға қилди. "Осиё чемпионатида Австралиядан кейин Хитойга мухлислик қиламан", - деди мактаб ўқувчиси.

Х.Холиқов.