Бобуржон Акбаров: "Дзюбага имкон бермасликка ҳаракат қилдик"

“Қалдирғочлар”нинг бошланғич таркибида марказий ҳимояда Хайрулла Каримов ва Бобуржон Акбаров тандеми ҳаракат қилди. Учрашувдан сўнг жамоамизнинг янги аъзоси Бобуржон Акбаровнинг фикрлари билан қизиқдик.

- “Ростов”га қарши ўйин қандай бўлди?
- Очиғини айтсам, бундай кучли рақибга қарши биринчи маротаба тўп тепишим. Бу каби назорат учрашувлари ҳозирги пайтда бизга жудаям керак. Кўпроқ шундай баҳслар ўтказиб турсак мавсум стартигача янги жамоадошларим билан янада яхшироқ тил топишиб оламиз.

- Айни дамда Россия премьер-лигаси тўпурари бўлиб турган Артём Дзюбага қарши ҳаракат қилиш қийинчилик туғдирмадими?
- Дзюба катта тажрибага маҳоратга эга. Унга қулай вазият яратмаслик учун ҳаракат қилдик.

- “Бунёдкор”даги тажрибали футболчиларнинг ёрдамини сезиб турибсизми?
- Албатта. Аввало мураббийларнинг кўрсатмалари ва бизга қаратаётган эътиборидан хурсандман. Шунингдек, марказий ҳимояда Хайрулла Каримовнинг кўмагини доимо ҳис қилиб тураман. Хайрулла ака қай вақтда қайси позицияда туришимни ва қандай ўйнаш кераклигини айтиб туради.