Бобур Йўлдошев: "ТТЙМИ майдонини кўриб тўғриси ачиндим"

Миржалол Қосимов шогирдларининг навбатдаги "қурбони" "Андижон" жамоаси бўлди. Coca Cola Суперлига 11-турида ТТЙМИ стадионида кечган учрашувда олмалиқликлар рақибларини 3:1 ҳисобида таслим қилди ва мағлубиятсиз сериясини 11та учрашувга етказди. Ушбу баҳсдан сўнг АГМК жамоаси ҳимоячиси Бобур Йўлдошев фикрлари билан ўртоқлашди.

"Тўғри "Локомотив" билан ўйиндаги сценарий такрорланди. Лекин, "Андижон" кўпроқ ҳимояга эътибор қаратди, бўш ҳудудлар қолдирмасликка ҳаракат қилди. "Локомотив" эса очиқ ўйин таклиф қилганди. Биринчи бўлимда вазиятлар яратмоқдамиз, имкониятлар бўляпти. Аммо, гол уришга қийналмоқдамиз. Шу нарса бизга тўсқинлик қилмоқда дейишим мумкин.

ТТЙМИ майдонини кўриб тўғриси ачиндим. Авваллари ҳам бу ерда кўп ўйнаганман, майдон ҳолати аъло даражада бўларди. Мураббийимиз айтганларидек бу баҳона бўлмаслиги керак. "Андижон" ҳам шу майдонда ўйнади, биз ҳам. Лекин, у қадар ёмон эмас, бемалол футбол ўйнаса бўлади.

Мағлубиятсиз серия қайд этаётганимиздан хурсандман. Бу ҳолат ёқимлидир. Ўтган мавсумда жамоа мураббийдан тортиб футболчигача янгидан тузилганди. Ҳар қандай жамоани шакллантириш учун маълум бир вақт керак бўлади. Бу йил жамоамиз ҳар томонлама шаклланишга эришди. Олдинга интилиш ва ўсишда давом этамиз",- дейди Йўлдошев.

Абдулазиз Искандаров ёзиб олди.