Бобур Йўлдошев: "Ўйиндан ўйинга жисмоний ҳолатимиз янада яхшиланиб боради"

Олмалиқ шаҳрида ўтказилган "Сурхон"га қарши учрашувда АГМК футболчилари тартибли ҳаракат қилган ҳолда ўзи яратган вазиятларнинг биттасидан унумли фойдаланди. Аниқроғи, туркманистонлик Арсланмирад Амоновнинг сўнги дақиқаларда жарима зарбасидан киритган тўпи ўйин масаласини ҳал қилди. Беллашувдан сўнг мезбонларнинг тажрибали ҳимоячиси Бобур Йўлдошев қисқача фикрларини билдирди.

"Карантиндан кейинги иккинчи учрашувимизни ўтказдик. "Сурхон" билан ўйин осон бўлмаслигини билардик. Боиси, рақибимиз ўзига ҳос характерга эга ва иродали жамоа ҳисобланарди. Улар аввалги турда ҳисобда ортда бораётиб дуранг натижани қайд этишганди. Рақиб футболчилари ҳимояда зич ҳаракат қилишди ва бизнинг ҳужумчиларга имкон беришмади. Шундай бўлсада охирги дақиқаларда гол уриб мақсадимизга эриша олдик. Ўйиндан ўйинга жисмоний ҳолатимиз яхшиланиб боради. Бунга шубҳа йўқ. Бундан буён қолган турларда ҳам томошабинбоп футбол кўрсатишга ҳаракат қиламиз",- дейди Бобур Йўлдошев.