Биринчи лига. Мавсум кашфиёти: Ҳумоюн Муртазоев!

Буни қанчалик амалладик, муносиб баҳони ўқувчилар беришади. Лекин ҳар бир клуб расмийларидан бунинг учун алоҳида миннатдорчилик эшитиб келдик.

Ортда қолган мавсум-2014да биринчи лига учрашувларини сайтимизда ёритиб борилишида асосий ишни бажарган  4 нафар ходимимиз турли номинациялар бўйича энг яхшиларни аниқлади.

Хусусан мавсум-2014 кашфиёти бўйича ўтказилган сўровномага кўра энг юқори баллни “Машъал-2” ҳужумчиси Ҳумоюн Муртазоев тўплади.

22 ёшли футболчи ҳақиқатдан ҳам бу йил мухлислар эътиборини кўпроқ ўзига жалб этди. Албатта у бунга ўз голлари ва жамоасига фойда келтириш билан эришди. Муртазоев мавсум чоғида ўз ҳисобига 9та гол ёздириб қўйишга эришди.  

Кейинги ўринни Нуриддин Ҳасанов эгаллади. 20 ёшли футболчи биринчи босқичда жуда яхши ҳаракат қилди. Натижада Сергей Лушан уни асосий жамоага олиб ўтди. Элитада дебют қилган Ҳасанов учун жорий мавсум ижобий ўтди деса бўлади.

“Истиқлол” аъзоси Шохруз Норхонов ўзини кўрсатишга эришди. Тошкентликларнинг ҳақиқий кашфиёти бўлди. Кўпинча унинг голлари учрашув тақдирини ҳал этди.
Биринчи лигада дебютанти “Ғиждувон” гарчи иккинчи босқичга чиқа олмаган бўлсада, жамоа сафида Мансур Отақулов ўзини кўрсатишга эришди. Ҳақиқий етакчиларга хос равишда ўйин намойиш этган футболчининг нима учун иккинчи босқичда ҳам биринчи лига жамоаларидан бирига ўтмагани биз учун мавҳум. Эхтимол Отақулов келаси йил яна биринчи лигага қайтар.

“УзДонгЖу” ҳужумчиси Озод Комилов бу йил биринчи лигада дебют учрашувини ўтказди. Андижондаги “Ихтисослаштирилган футбол мактаб интернати” битирувчиси бўлган Комилов Андижон футболининг келажагидир. 17 ёшли футболчи агарда юлдузлик касалига учрамасдан, ўз устида ишлашни канда қилмаса шубҳасиз ундан етук савиядаги ҳужумчи етишиб чиқади.   

Мавсум кашфиёти:
Ҳумоюн Муртазоев (“Машъал-2”) - 19
Нуриддин Ҳасанов (“Бунёдкор-2”) - 14
Шохруз Норхонов (“Истиқлол”) - 12
Мансур Отақулов (“Ғиждувон”) - 9
Озод Комилов (“УзДонгЖу”) - 6