Биринчи лига. "Динамо" мавсумни йирик ғалаба билан якунлади

Мавсумнинг сўнгги ўйинида ҳам дастлабки дақиқалардан ҳужумкор ўйин намойиш этган Илҳом Шарипов шогирдлари ўйиннинг 12-дақиқасига келиб ҳисобни очишди. Яримҳимоячи Искандар Холмирзаевнинг зарбасидан сўнг тўп рақиб дарвозасидан жой олди, 0:1.

Голдан руҳланган меҳмонлар кўп ўтмай орадаги фарқни иккитага етказишди. Ўнг қанотдаги ҳужумкорлиги билан ажралиб турган яримҳимоячи Жонибек Кўчимов 18-дақиқада ҳисобни 0:2 га етказди.

Иккинчи бўлимда ҳам вакилларимиз ўйин тизгинини ўз қўлларида сақлаб, натижани йирик кўринишга олиб келишди. 73-дақиқада «Хотира-79» дарвозаси томон белгиланган 11 метрлик жарима зарбасидан Омаджон Тайлоқов унумли фойдаланди, 0:3.

Мавсумдаги сўнгги баҳсда ҳам йирик натижали ғалабага эришган «Динамочилар» жами 32 ўйинда 86 та гол киритиб, 26 ғалаба билан 82 очко жамғарган ҳолда Биринчи Лига-2016 мавсумини ғолиб сифатида якунлашди. Ушбу натижа билан «Динамо» мухлисларини яна бир карра табриклаб қоламиз.

Биринчи Лига. 24-турнинг қолдирилган учрашуви.

12 ноябрь (шанба)

«ХОТИРА-79» - «ДИНАМО» - 0:3 (0:2)

Голлар: Искандар Холмирзаев 12, Жонибек Кўчимов 18, Омаджон Тайлоқов 73 пенальтидан.

«Динамо»: Михаил Наумов (Рустам Тоштурдиев), Алексей Николаев (Лазиз Нуридинов), Бунёд Исроилов, Фирдавс Абдусалимов, Убайдулло Набиев, Искандар Холмирзаев (Комил Шарофутдинов), Омаджон Тайлоқов, Жасур Азимов (Ислом Шарипов), Жонибек Кўчимов, Виктор Клишин, Алишер Холиқов (Ҳакимхон Аъламхонов).