Бечора майдон

Гарчи ғалаба қозонган бўлсак-да, Қатар билан ўйиндан кейин Одил Аҳмедов чидаб туролмай ичидаги гапларни қисқа интервьюсида тўкиб солганди. Аммо ўшанда унинг гапларига ҳеч ким парво қилмади. ЎФА биронта баёнот ҳам бермади. Майдон ҳолатини яхшилаймиз деб ҳеч ким гапирмади. Умуман бизда шунақа: гапираверсан, гапираверасан ҳамма эшитади, лекин ҳеч ким миқ этмайди.

Биз шу ҳам одам, тўп тепиб юрибди, билмаса гапирмайди деб ўйламаймиз. Майдон ҳолатини яхшилаш устида бош қотирмаймиз. Майдон чими нега яхши эмас дейилса ичкарида вентиляция йўқ деб қутилиб қўя қоламиз. Боз устига майдон майсасини янаям бадтар ҳолатга келтириб устма-уст ўйин ўтказамиз.

"Миллий" стадион уч кун ичида 6та ўйинни қабул қилади. 23 ноябрь CAFA аёллар чемпионатидан ўрин олган иккита баҳс ўтказилди. Кеча "Бунёдкор"нинг ўзи ўйнади ва ундан кейин спартакиада ўтказилди. Бугун яна CAFA мусобақасидаги иккита учрашув бўлиб ўтади. Куз келиб дам олишга ҳозирланаётган майдон буни кўриб йиғлаб юборса керак.

Майдон ҳолати ёмон, яхшилаш керак деймиз-у, лекин бошқа жой йўқдек кўп ўйинларни шу ерга бошлаб келамиз. Яхшиям бизда "Бунёдкор" бор. Бўлмаса қаерга борардик?!