Бахтиёр Ашурматов: "Тарихий ғалабага эришдик"

- "Тўғриси, биринчи бўлимдаги “Насаф”нинг тезкор ўйини бизни анча хавотирга солиб қўйди. Бердиев жуда ёш ва курашувчан жамоа тузган. Биз “Насаф”нинг ўтган турдаги “Қўқон-1912” жамоаси билан ўйинини кўриб чиққан эдик ва бундан анча хавфсирагандик. Лекин футболчиларимиз бу ўйинга тузган режаларимиз ва кўрсатмаларни тўлиқ бажаришга ҳаракат қилишди".

- "Қийин ўйинда ғалаба қозондик. Шахсан “Насаф” жамоаси ўйинчиларига ҳам, ўзимизни йигитларга ҳам бугун кўрсатган ўйин учун ташаккур билдираман. Менимча, стадионга ташриф буюрган мухлислар мазмунли футбол томоша қилишди. Бугунги ғалаба орқали футболчиларимиз билан фахрланаман. Мухлисларимизни ҳам хурсанд қила олдик. Тўғри, биз камроқ ғалаба қозонаяпмиз. Мухлисларимиз ҳам ғалабани соғиниб қолишган эди. Бугун буни уддаладик". 

- "Агар йигитлар шундай иштиёқ билан ўйнашса, албатта қийин вазиятдан чиқиб кета оламиз. Насиб этса, турнир жадвалидаги ҳолатни яхшилаб оламиз. Албатта, бугун биз Қаршида тарихий ғалабага эришдик. "Қора анъана"га барҳам бера олдик. Йигитларга бу ҳақда таъкидлаган эдим. Буни улар уддалай олишди. Омад ҳам биз томонда бўлди. Мабода “Насаф” биринчи бўлимдаги вазиятлардан фойдалана олганида, бизга қийин бўларди".

Зоҳир Примов (АГМК ярим ҳимоячиси): - "Бугун футбол ишқибозлари жуда қизиқарли учрашув гувоҳи бўлишди. Мураббийларимиз берган кўрсатмаларни бутун жамоа бўлиб тўғри бажаришга ҳаракат қилдик. Шунинг эвазига ғалаба қозондик. Иккинчи бўлим олдидан мураббийларимиз фақат ҳимояда эмас, ҳужумлар ҳам ташкил этишимизни таъкидлаган эди. Шунга ҳаракат қилдик ва ғалабага эришдик".

"Насаф" ПФК матбуот хизмати.