"Бавария" янги мавсумга тайёргарликни бошлади ФОТО

Даставвал жамоани хорватиялик янги бош мураббий Нико Ковач қабул қилиб олди ва унинг иштирокида матбуот анжумани ўтказилди. Нико Ковач "Бавария" устози сифатида илк бор матбуот анжуманида қатнашди.

Шунингдек, матбуот анжуманида "Бавария" спорт директори Хасан Салихамиджич ҳам иштирок этди.

Шуни қайд этиб ўтиш керакки, "Бавария"га ўтган мавсумни "Хоффенхайм"да ижарада ўтказган ҳужумкор вингер  Серж Гнабри ҳам қайтди.  Гнабри иштирокида ҳам бугун Мюнхенда матбуот анжумани ташкил этилди.

Нико Ковач матбуот анжуманидан сўнг жамоа ихтиёрида бўлиб турган футболчилар билан машғулотларга киришди. Дастлабки машғулотларда ёшлар жамоасидаги футболчилар билан бир қаторда асосий таркиб аъзоларидан Франк Рибери, Арьен Роббен, Рафинья ва ижарадан "Бавария"га қайтган Ренату Саншеш иштирок этади.

Серж Гнабри эса ўтган мавсум охирида олган жароҳати туфайли илк машғулотларни ўтказиб юборади. Шунингдек, Давид Алаба ҳам қўшимча таътил кунлари туфайли жамоага сал кечроқ қўшилади.
Терма жамоалари билан Жаҳон чемпионатида иштирок этган футболчилар эса йиғинга маълум танаффусдан сўнг қўшилишади.

Артуро Видаль ва Серж Гнабри дастлаб индивидуал дастур бўйича шуғулланиб туришади.

"Бавария"нинг Мюнхендаги қароргоҳи - Зэбенерштрасседа қурилиш ишларини олиб бораётгани туфайли жамоанинг машғулотлари 1-августга қадар ОАВ вакиллари учун "ёпиқ" ҳолда ўтказилади.

Нико Ковач жамоа мураббийлар штабига аввал "Бавария"да Юпп Хайнкес ёрдамчиси сифатида ишлаб келган Петер Херманнни қайтарди. Тажрибали мутахассис Петер Херманн Нико Ковачга ёрдамчи мураббий сифатида кўмаклашади.