«Бавария» Коутиньо билан келишувни август охирига қадар узайтирмоқчи

Mundo Deportivo хабарига кўра, агар Коутиньонинг жароҳатдан фориғ бўлиши режа бўйича кетса, у июнь ойи ўрталарида сафга қайтиши кутилмоқда. Агар шундай бўладиган бўлса, бразилиялик футболчи Бундеслиганинг сўнгги тур учрашувларида майдонга туша олади.

Агар Коутиньо кутилган спорт формасига қайта олса, Германия кубоги финалида ҳам тўп тепиши мумкин. Бунинг учун мюнхенликлар мусобақа ярим финалидан муваффақиятли ўтишлари керак бўлади. Шунингдек, футболчи август ойида ўтказилиши режалаштирилаётган ЕЧЛ учрашувларида ҳам жамоасига ёрдам бериши мумкин.

Бунинг учун “Бавария” футболчи билан амалдаги келишувни август ойи охирига қадар узайтириши лозим бўлади. Немис клуби бу ишни амалга ошириши учун “Барселона” билан келишиб олиши даркор.

Ҳозирча “Бавария” раҳбарияти ижара муддатини узайтириш борасида Коутиньонинг ўзига хабар бермаган.

Коутиньо 24 апрель куни ўнг оёғидан олган жароҳати боис жарроҳлик столига ётқизилган эди. 

Илгарироқ футболчининг хизматларига “Ньюкасл”, “Челси” ва “Лестер” қизиқаётганлиги ҳақида хабарлар тарқатилганди. “Бавария” футболчининг трансферини сотиб олиш ниятида эмас.