"Барселона" - "Атлетико"
04 mar 2018 15:35
News

"Барселона" - "Атлетико"

Бугун, 4 март куни Тошкент вақти билан 20:15да "Барселона" ҳамда "Атлетико" ўртасидаги ЛаЛига 27-турининг марказий учрашувига старт берилади.

Ушбу учрашувга оид маълумотлар, жамоа ҳақида янгиликларни мана шу превьюда билиб оласиз.

Турнир жадвалидаги ҳолат

Ушбу ўйинда чемпионат ғолиблиги учун курашаётган асоий даъвогарлар куч синашади. "Барселона"нинг "Лас-Пальмас"га қарши баҳсдаги омадсизлиги интригани қайтарди. Бироқ "матрасчилар" шунчаки Каталония клуби ортида ўтириш ўрнига, қолган барча учрашувларда ғалаба қозониши керак. Кўк-анорранглилар ҳозиргача ЛаЛигада 66 очко тўплади, рақиб эса 5 очко орқада. Бу ўйинда мадридликларни нафақат мухлислар, балки "Реал" ва "Валенсия" ҳам қўллаб-қувватлайди.

Жамоа янгиликлари

"Барселона"

Vueling Airlines авиакомпанияси ўз президенти Хавьер Санчес-Приетонинг "Барселона" ҳужумчиси Лионель Месси номига айтган сўзлари учун узр сўрашига тўғри келди. "Биз ҳеч қачон бирор футболчи билан баҳслашишни хоҳламаганмиз. Месси бизга ҳеч қандай муаммо туғдирмаганлигини тасдиқлай оламиз" - дейилади компания матбуот-хизмати баёнотида. Олдинроқ, Санчес-Прието Барселонадаги янги терминал Лионель Мессининг уйига яқин эканлиги туфайли қурилмаслигини айтган эди. "Месси шу яқин ўртада истиқомат қилгани учун аэропортни кенгайтириш мумкин эмас. Бунақаси дунёнинг ҳеч бир жойида бўлмайди" - дейди Санчес-Прието. Расмий раддияга кўра, аэропорт кенгайтирилиши Месси яшайдиган Гава шаҳарчасининг экологиясига салбий таъсир қилади.

"Барселона" ҳамда "Лас-Пальмас" ўртасидаги ЛаЛиганинг 26-тур ўйинида (1:1) Каталония клуби дарвозаси томон белгиланган пенальти кўпчиликда шубҳага сабаб бўлди. 11 метрлик нуқтани кўрсатган Матеу Лаос "Барселона"нинг рекордини якунлади. ЛаЛига доирасидаги 78та учрашувда кўк-анорранглилар дарвозаси томон пенальти белгиланмаган эди. Клуб бу рекордни ўрнатиши учун 2 йил керак бўлди.

"Атлетико"

"Атлетико" ярим ҳимоячиси Томас Парти клуб билан шартномасини 2023 йилнинг ёзигача узайтирди. "Мен доимо тер тўкиб меҳнат қилишга ҳаракат қиламан, асосий жамоагача етиб келиш жуда қийин бўлди. Бу клуб сафида тўп тепаётганимдан фахрланаман. Ўйин амалиётига эга бўляпман ва бундан мамнунман. Жамоамиз яхши формада ва сўнгги вақтларда кўплаб голлар урмоқда. Юқори ўринлар учун курашни давом эттирамиз" - дейди Томас. Ганалик ярим ҳимоячи 2011 йилдан бери "Атлетико" клубида шуғулланмоқда. Жорий мавсум 24 ёшли Томас ЛаЛиганинг 24та учрашувида иштирок этди ва 3та гол урди.

"Атлетико" ҳужумчиси Антуан Гризманн "матрасчилар" сафида 100-голини урди. Франциялик "Леганес"га қарши баҳсда (4:0) покер қайд этди. Айни дамда унинг мадридликлар сафида урган голлари сони 103та. Сўнгги тўрт мавсумда испан клублари орасида Гризманндан фақат Лионель Месси "("Барселона" - 183), Криштиану Роналду ("Реал" - 182), Луис Суарес ("Барселона" - 144) ва Ариц Адурис ("Атлетик" - 104) кўп гол урди. Гризманн 2014 йилда "Реал Сосьедад"дан "Атлетико"га ўтган эди. Ўша пайтдан бери франциялик футболчи пойтахт клуби сафида 192та ўйин ўтказди (барча турнирларда).

Асосий футболчилар

Лионель Месси

"Барселона"нинг аргентиналик ҳужумчиси узоқ вақтдан бери юқори савияда тўп тепмоқда ва айнан шу туфайли Каталония клуби барча турнирларда ғолиблик учун курашиб келмоқда. Месси хотиржамлик билан янги рекордлар қўймоқда ва эришилган натижалар билан тўхтаб қолишни истамаяпти. Маъсулият юқори бўлган ўйинлар, "Атлетико" билан учрашув - айнан шундай баҳслар сафига киради, Лионелни янада кўпроқ илҳмолантиради. Месси баъзида узоқ вақт давомида майдонда кўринмай қолсада, унинг етакчилик сифатлари шубҳага боришимизга йўл бермайди, Леонинг ўйинни ҳис қилиш қобилияти йилдан-йилга кучайиб бормоқда.

Антуан Гризманн

ЛаЛиганинг сўнгги турида "Атлетико" "Леганес"ни 4:0 ҳисобида мағлуб этди. Учрашувдаги барча голларга Антуан муаллифлик қилди. Бундан ташқари, аввалги турди франциялик фаолиятидаги биринчи хет-трикни қайд этди, энди эса покер. Антуан хоҳлаган услубида гол урмоқда: Бош билан, қарши ҳужумда, жарима зарбасидан... "Атлетико" натижалари Гризманнга боғлиқ бўлиб қолмоқда. "Барселона" билан баҳсда "Сосьедад" собиқ футболчиси ажойиб формада эканлигини яна бир бор исботлаб, "бу вақтинча" деган танқидчиларга чиройли жавоб бериши мумкин.

Тахминий таркиблар

"Барселона": Тер Штеген, Альба, Юмтити, Пике, Роберто, Паулиньо, Бускетс, Коутиньо, Иньеста, Суарес, Месси.

"Атлетико": Облак, Луис, Годин, Хименес, Хуанфран, Партей, Ньигес, Коке, Корреа, Коста, Гризманн.

Ўйиндан аввалги фирклар

Эрнесто Вальверде: "Атлетико" билан баҳс катта эътибор йиға оладиган учрашувлар сирасига киради. Икки жамоа ҳам кучли ва 3 очко олишни истайди. "Барселона" бу ўйинда ғалаба қозониш учун бор кучини ишга солиши керак. "Камп Ноу" бизни қўллаб-қувватлашдан чарчамайди деб умид қиламан. Мухлисларнинг шовқинига умид қиламан.

Серхио Бускетс: Биз ҳали ҳам яхши ҳолатдамиз, устунликка эгамиз, бироқ якшанба куни бизни оғир кураш кутиб турибди. "Лас-Пальмас"га қарши учрашувда икки муҳим очкодан айрилдик, бироқ рақибнинг турнир жадвалидаги ўрнидан қатъий назар баҳс қийин ўтишини билардик.

Диего Симеоне: Трансфер ойнаси ҳамма учун бир кунда ёпилса яхши бўларди. Шундагина футболчи, мураббий ва клублар ўзини хотиржам ҳис қила оларди. Бошқа одамларнинг шахсий ишига бурин тиқмайман. Гап молиявий фойда ҳақида кетаётган бўлса, майли, бу унинг қарори. Футболда ҳеч нарса мени ҳайрон қолдира олмайди. Бундай нарсалар доимо содир бўлади.

Филипе Луис: Ҳеч қачон "Камп Ноу"да ғолиб бўлмаганман. Бу мен учун чақирув. Барселонадаги майдон бошқачароқ: Жуда кенг ва узун. Сўнгги йилларда биз у ерда ғалабага яқин бўлдик, шу сабабли нега энди бу ишни навбатдаги баҳсда бажармасак? Дуранг? Йўқ, мен ҳеч қачон дуранг учун ўйнаганман. Биз ғалаба қозонишни истаймиз. Ҳозир яхши натижага эришиш учун ажойиб пайт. "Барселона" кучли жамоа, футболчилари ҳам, бироқ бизда албатта имкониятлар бўлади.

Месси қанотига бириктирилган футболчи доимо азият чекади. У қанотдан-қанотга ўтиб доимо вазият қидиради. Мессининг тўхтатиш қийин, шу сабабли у кўп қиррали футболчи. Леони тўхтатишнинг энг яхши йўли - унга икки футболчини бириктириб қўйиш.

Баҳсга оид қизиқарли маълумотлар

- "Барселона" уйида ўтказган 24та учрашувнинг (ЛаЛига) 22тасида ғалабага эришган.

- Каталония клуби уйидаги 24та ўйиннинг (ЛаЛига) 23тасида камида 2тадан гол уришга муваффақ бўлган.

- "Атлетико" сўнгги олтита учрашувнинг барчасида ғалаба қозониб келмоқда (ЛаЛига).

- "Барселона" "Атлетико"га қарши ўтказган сўнгги 17та уй учрашувида мағлуб бўлмай келмоқда (барча турнирларда).

- "Атлетико" сўнгги 6та ўйиннинг 5тасида дарвозасини "қуруқ" сақлай олди.

- "Матрасчилар" сўнгги 3та ўйинда камида 2тадан гол уришди.

Barcelona

Lionel Messi - 26'

LaLiga . Round 27

04/03/2018, 19:15

Finished