Баҳром Ҳайдаров: "Плей-оффда ўйнайдиган 4 та клуб ҳам Суперлигада қолса керак"

"Бугунги ғалаба билан мухлислар ва раҳбариятни табриклайман. Аслида бошқача табриклашни хоҳлагандим, афсуски ҳали расман Суперлигада қолиш вазифасини бажармадик. Лекин нима бўлса ҳам уйдаги ғалаба мухлисларга қувонч бағишлади деб ўйлайман.

Учрашув бошидан рақибга босим қилдик, чунки бизга ғалаба зарур эди. Қизил карточка "Сўғдиёна" режаларини бузгандек кўринди, аммо бу четлатиш айнан бизнинг босимимиз туфайли бўлди. 10 киши бўлса ҳам рақиб сафида Дориев, Жалолиддинов ва Қаҳрамонов каби кучли ижрочилар бор эди. Биринчи таймдаги вазиятлардан фойдаланганимизда баҳс бунчалик асабий ўтмасди. Иккинчи голдан кейин бугунги ўйинга қўшилган вазифани бажардик.

Рақиб камчиликда қолганидан кейин бизга осонроқ бўлганини тан оламан. Ҳужум пайтида бўш зоналар кўпроқ бўлди.

Плей-оффда ўйнайдиган барча жамоалар ўтган йил Про лигадан чиққанди? Фақат "Хоразм" биринчи даврада кўпроқ очко олди, иккинчи даврада қолган учта клуб яхши ўйнади. "Қўқон-1912" иккинчи даврада очко йиғиш бўйича 4-ўринни олди. Бу йилги Про лига билан ўтган йилги Про лиганинг фарқи жуда катта. Шу сабаб "Арал"га ҳурмат сақлаган ҳолда айтаманки плей-оффда ўйнайдиган барча 4 та клуб ҳам Суперлигада қолса керак", - деди Баҳром Ҳайдаров.