Баҳром Ҳайдаров: "Иккита мағлубиятдан сўнг фожиа ясаш нотўғри"

"Насаф" мамлакатимиздаги энг кучли жамоалардан бири. "Насаф"га қаршилик кўрсатиш қийин эди, аммо йигитлар ҳаракат қилишди. Вазиятларга ҳам эга бўлдик. Ҳаёт тўхтаб қолгани йўқ. Имкониятларга эга бўлаяпмизми, демак бизда ўсиш учун потенциал бор. Сўнгги уч турда мусобақа жадвалининг энг юқори поғонасидаги клубларга қарши ўйнадик. Уларга қарши ўйинларда кўпроқ очколарни қўлга киритишини мақсад қилгандик. Биз уч очко тўплай олдик. Олдинда ҳали ўйинлар бор. Бугунги учрашувлардан сўнг тажрибамиз ортиб боради. Биз ўзимиз ҳам "планка"ни кўтариб қўйдик. Энди раҳбарият ҳам мухлислар ҳам бундай кучли рақибларга қарши ўйинларда ғалаба кутишмоқда. Сўнгги икки учрашувда мағлуб бўлдик ва бундан катта ҳалокат ясаш керак эмас. Ишлашда давом этамиз", - деди Баҳром Ҳайдаров баҳс якунлангач.

- Биринчи бўлим сўнгида Бешимов жуда яхши имкониятга эга бўлади. Ўша вазиятда фойдалана олмаганига нима сабаб бўлди?

- Деярли 100%лик вазият эди. Мен ҳам гол бўлди деб ўйлагандим. Бу ерда дарвозабон маҳорати ҳам ўз сўзини айтди. Тўғри бундай вазиятларни кўкка совуриш керак эмас, сабаби Суперлигада яримта вазиятдан ҳам фойдаланиш талаб этилади. Бешимов ўсишда давом этмоқда ва ҳали унда яна имкониятлар бўлишига ишончим комил.

- Биринчи давра якунидан сўнг 2-3та футболчилар харид қилинса яхши бўлар эди. Айниқса сифатли футболчилар жамоага қўшилса, жамоа янада кучая оладигандек...

- Биз янги жамоамиз. Суперлигага чиққанимиздан сўнг янги футболчиларни ҳам қўшдик. Секин асталик билан жамоа жипслашиб бормоқда. Биз катта "революция"га қилмаймиз, аммо бир-иккита позицияни кучайтириш ниятимиз бор. Вариантлар ҳам бор, аммо уларнинг номини очиқламайман. Имкониятимиздан келиб чиққан ҳолда, менга керакли позицияларни кучайтирамиз. Иккита мағлубиятдан кейин фожиа ясаш ҳам нотўғри. Ҳозирги кундаги мақсадимиз жамоадаги футболчиларни ривожлантириш. Бешимов, Ҳусанов ва Жўрабоевга ўхшаган футболчиларни ривожлантириш. Агар улардан яхшироқ футболчиларни топа олсак, уларни ўз сафимизга қўшиб олишга ҳаракат қиламиз.