Азим Аҳмедов: «Наманганлик мухлисларга раҳмат айтаман»

Хусусан жамоа «Навбаҳор»да ўзини кўрсатиб, тажрибасини ошириб борган Азим Аҳмедовни сафга чорлади. Аҳмедов наманганликларнинг асосий таркиб футболчиси сифатида тўп тепиб келганди. Эндиликда у «Пахтакор» шарафини ҳимоя қилади. Унинг «шерлар»га ўтиши расман ҳал бўлганидан сўнг кичик Аҳмедов билан суҳбатда бўлдик.

- «Пахтакор»га ўтишим шу яқин кунларда ижобий ҳал бўлди, - деб гап бошлади Аҳмедов. Биласиз, ҳар бир футболчи келажакда кучлироқ жамоада тўп тепишни ва ютуқларни қўлга киритишни истайди. Айнан шундай истак менда ҳам бор эди. «Пахтакор» варианти юзага келиб қолганидан сўнг эса буни қабул қилишга қарор қилдим. Албатта, бир тўхтамга келишим осон кечгани йўқ. Биринчи навбатда акам билан маслаҳатлашдим. Қолаверса, «Навбаҳор» мураббийи ва раҳбариятига бу истагимни билдирдим. Барча билан ўзаро маслаҳатлашиб бўлганимдан сўнг «Пахтакор» сафига қўшилдим.

- Адашмасак, Сизга «Нефтчи» жамоаси томонидан ҳам таклиф тушганди, тўғрими?
- Таклифлар бор эди. Лекин «Пахтакор»дан тушган таклиф мени қизиқтириб қўйганди. Шу боисдан қолган таклифлар устида ўйлаб ўтирмадим. Осиё Чемпионлар лигасида ўйнаш орзум. Шунингдек, бу клуб билан мамлакат чемпиони ва кубокида ютишни истаётганлигим боис, «шерлар» сафига бориб қўшилишни кўпроқ хоҳладим.