Аёллар футболи шунчалик ночор аҳволдами?

Бугун иш юзасидан бир стадионга бордим. Ярим майдонда, Тошкент клубига тегишли аёллар жамоаси машғулот ўтказаяпти. Четда клубга даҳлдор икки аёлни гапи эшитилиб турибди.

- Мен айтаяпман буларга чой ичиб келларинг деб, аммо пули йўқ.
- Аёлларда бу қийинроқ, эркаклар чидамли бўлади. Булар уйида чой ичмаса, клуб хабар олмаса, олаётган 500 000 сўмини нимага ишлатади? Ҳозир иссиқда машғулот ўтказишаяпти. Бир нима бўлса боласига ким қарайди?
- Шуни клубга айтайлик?
- Фойдаси йўқ, йилда бир мукофот пули беради, у ҳам 8 март учун, 100 000 сўм. Ана (аллакмини айтди) фарзанди бор, эри йўқ. Шу пул билан оила боқиб бўларканми?

Машғулот тугади. Мураббий барча қизларни тўплади ва эълон қилди.
Эрта индин пластикка маош тушади. Ҳар машғулотга бир киши 1кг шакар олиб келсин. Шакар неча пул ўзи?
Ҳар томонда овоз. 4500 сўм... 5000 сўм...
Хуллас, шакар олиб келиш бўйича навбатчи тайинланди.

Хўжакўрсинга аёллар футболини тузишдан мақсад нима? У ерда оналар ўйнаяпти ахир... Барчасини қўли шириндир, айримлари чевардир. Ундан кўра шу иш билан шуғулланиб, сборма сбор юрмасдан оила тарбияси билан шуғулланишса бўлармиди...

Ёки ўша клублар маъсулиятни ҳис қилиб шароит қилиб берармиди, ҳеч бўлмаса шакарини олиб берсин...

Нодирхўжа Юлдашев
Телеграмдаги канал @nadirkhuja