Австралия бош мураббийи: "Биз яна мухлисларга қувонч улашишни хоҳлаймиз"

ЖЧ-2018 йўлида кураш олиб бораётган Австралия ва Сурия миллий терма жамоалари эртага плей-офф жавоб баҳсида майдонга тушишади. Хабарингиз бор, Малайзияда бўлиб ўтган биринчи ўйинда 1:1 ҳисоби қайд этилганди. Эртанги ўйин Тошкент вақти билан 14:00да старт олади. 

Австралия терма жамоаси бош мураббийи Анге Постекоглу "соккерузлар" Сурияга қарши жавоб баҳсида ғалаба қозонишига ишонмоқда. Эртанги беллашув Сиднейдаги энг катта стадионда бўлиб ўтади. Бу стадионда Австралия 2015 йил Осиё Кубоги финалида ўйнаб, Жанубий Кореяни 2:1 ҳисобида мағлуб этган ва бош совринни қўлга киритган. 

Мураббийнинг эртанги ўйин олдидан фикрлари қуйидагича бўлди: 

"Бу стадион билан боғлиқ бизда ажойиб хотиралар сақланиб қолган", - дейди Австралия термаси устози Анге Постекоглу. - Ҳозирги таркибнинг 80 фоизи четда ўйнамоқда, бу стадионга келганда ҳамма маза қилиб тўп тепгиси келади". 

"Жамоа бўлажак учрашувга тайёр. Биз Сурияни мағлуб этиб мухлисларга қувонч улашишни хоҳлаймиз. Футболчилар терма жамоада ўйнаш фақат ўзлари учун эмас, балки оилалари, қариндошлари ва Ватан учунлигини жуда яхши билишади".