Асрор Алиқулов: "Мухлислар ғалаба кутишади? Мураббийлар ғалаба қозонишни истамайдими?"

"Динамо" жамоаси билан учинчи ўрин учун курашаётган эдик. Улар таркиб жиҳатдан биздан устун ҳисобланарди. Йигитларга ўзимиз тайёрлаган тактика асосида ўйнашни таъкидлагандик. Барибир ёш футболчиларимизда тажриба кам, жисмоний жиҳатдан ҳам футболчилар толиқиб қолишди. Ёши катта футболчиларни ушбу учрашувга жалб қилмадик. Чунки катта футболчилар майдонда ёшларни ортидан эргаштира олиши керак. Биз улардан шуни талаб қилгандик. Лекин охирги ўйинларда улар бор кучлари билан ўйнамади. Оралиқда жамоани бир оила сифатида шакллантиришда менга бироз малака етишмади. Барчаси ўз қўлимизда эди. Имкониятимиз юқори баҳоланганди. Жамоага трансфер таъқиқи қўйилган. Бу қачон ҳал қилиниши бизга қоронғу. Ёш футболчиларни катта футболга тезроқ кириши ва ўзида шуни ҳис қилиши учун жалб қилмоқдамиз. Кейинги мавсумда "Шўртан" шаънини мана шу йигитлар ҳимоя қилиши мумкин.

Бу йил қийин ўтди. Мухлислар ғалаба кутади, лекин тасаввур қилинг мураббийлар ғалаба қозонишни истамайдими? Жамоамизда футболчи танлашда қолган жамоаларга қараганда имконият йўқ эди. Қийин ўйинларда футболчилар ўз зиммаларига кўп нарсани олишди.

Ҳозирда соғлиқни тиклаб озроқ дам олишни ният қилганман. Фаолиятимни қаерда давом эттиришим яқин икки ёки уч ҳафтада аниқ бўлади",- дейди Асрор Алиқулов.