Асрор Алиқулов: “Дерби курашларга бой ўтиши кутилганди”

Ўйин ҳақида

- Дерби курашларга бой ўтиши кутилганди. Футболчилар ўйинни яхши бошлашди. Яхши босимлар қила олдик. Меҳмонлар тактик услубларини ўзгартириб боришди. Биз вазиятлардан яхши чиқиб кета олдик. Керак вазиятларда яхши ҳимояландик. Жамоамиз аъзолари ва мухлисларни ғалаба билан табриклайман.

- Бугун VAR тизими ишлаши аввалги ўйиндаги баҳси ҳолатлар туфайлими? Клуб бу борада ташаббус билан чиқдими?

- Йўқ, бу бизнинг ташаббус эди десак ҳам жуда тўғри бўлмайди. Ҳалол ўйин, ҳаққоний футбол. Шуни англаган ҳолда клубимиз раҳбарияти VAR тизимини таклиф этди. Ҳаражатлари ҳам клубимиз томонидан қоплаб берилди. Кўп қўполликлар бўлмади, агрессив футбол бўлмади.

- Демак, VAR тизими ишлаган ўйинда майдон эгаси ҳаражатларни тўлаб берадими?

- Билишимча шундай. 

- Асрор ака, ғалабалар бардавом бўлиши учун “Машъал”га нималар зарур деб ўйлайсиз?

- Кучли футболчилар керак. Баъзи ҳолатларда тажриба ҳам етишмаяпти. Оддий ҳолатларда хатоликларга йўл қўйяпмиз. Баъзи футболчиларда Про-лига даражасидаги ўйин амалиёти етишмайди. Марказий ҳимояда кўп жамоаларда легионер хизматидан фойдаланишади.

- “Машъал” Суперлигага йўл олса, моддий жиҳатдан, инфратузилма ва таркиб жиҳатдан юқори лигага тайёр бўла оладими?

- Раҳбарият ва ҳомийлар моддий жиҳатдан жамоани тўлиқ таъминлаб бера олишаяпти. Бу борада муаммо йўқ. Инфратузилма бўйича ишлар давом этаяпти. Таркиб жиҳатдан ўсишимиз керак. Ҳозир кўраяпсиз, Суперлигада очко олиш жуда қийин.