Артём Филипосян: “Ҳозирги натижаларда мураббийларнинг ҳиссаси катта”

Ваҳоланки, қишда “Бухоро”да катта ўзгаришлар кузатилди, мураббий ва футболчилар алмашди. Одатда, янги тузилган жамоанинг ўзини ўнглаб олиши учун вақт талаб этилади. Аммо бухороликларда ҳам бу жараён жуда яхши давом этаётганини кўриб турибмиз. Ҳеч ким уларни совринли ўринлар учун курашишини кутмаганди. Жароҳатидан қутулиб яна ўзини кўрсатишни бошлаган ҳимоячи Артём Филипосян “Бухоро”нинг ҳимоя чизиғини тартибга солган ҳолда жамоага фойда келтиряпти. Ўтган йилдан бери ушбу жамоа шарафини ҳимоя қилаётган ўйинчи клубнинг ҳозирги муваффақиятли ҳақида ўз муносабатини билдирди.

“Мураббийларимизнинг ҳиссаси катта бўляпти”
-  “Бухоро” жамоасининг бу йилги мавсумни кўтаринки руҳда ўтказаётгани ростдан ҳам бор гап. Айни пайтга келиб турнир жадвалининг 2-ўрнида бораётганимиз албатта жуда яхши кўрсатгич. Лекин шуни сизга аниқ айта оламанки, бу ўз-ўзидан содир бўлаётгани йўқ. Бунинг учун жамоа жуда катта меҳнат қилаётганини айтишим зарур. Ўзингиз таркибимизни кўриб турибсиз, бизда яққол ажралиб турадиган юлдуз ўйинчи йўқ. Бу ерда асосан меҳнаткаш футболчилар жамланган. Сизга ростини айтадиган бўлсам, жамоамизнинг бугунги кунда 2-ўринда бўлишида мураббийлар – Улуғбек Бақоев билан Бахтиёр Ашурматовнинг ҳиссаси жуда катта бўляпти. Айнан уларнинг тўғри йўналишда иш олиб бораётганлиги ва кўрсатмаларини тўғри бажариб келаётганимиз сабабли ҳам натижаларимиз чакки эмас. Мураббий ва футболчилар ўртасида бир-бирига бўлган ишонч жуда катта. Ўйлайманки, маҳаллий мухлисларимиз ҳам “Бухоро”нинг ўйинлари ва қайд этаётган натижаларидан хурсанд бўлишяпти. Лекин биз бу билан тўхтаб қолмоқчи эмасмиз.

“Ғалабага муносиб эдик”
-  Биласизми, “Динамо”га қарши бўлиб ўтган ўйинда ғалаба қозонишимизга ишонгандик. Чунки биз ушбу беллашувга жуда яхши тайёргарлик кўргандик. Лекин ўз майдонимизда “Динамо”ни юта олмадик. Аслида эса ғалабага жуда яқин келгандик ва бунинг учун муносиб ўйин кўрсатгандик. Афсуски, футболда шунақаси ҳам бўлиб туради. Мен ўша ўйинни бошқариб борган ҳакамлар ҳақида гапирмоқчи эмасман. Шунчаки, ўз ўйинимизга эътибор қаратишни яхши кўраман. Футболда ҳамма вақт ғалаба қозонишнинг имкони йўқ-да! Ўша куни минг ҳаракат қилмайлик, барибир омадимиз чопмади. Устига-устак ўзимиз ҳам яратилган қулай имкониятлардан фойдалана олмадик. Бизга биргина гол етишмади холос.

“Жамоа олдига аслида ҳеч қандай вазифа қўйилмаган”
-  Бу йилги мавсум олдидан “Бухоро”нинг олдига ҳеч қандай аниқ вазифа қўйилмаган, гапимга ишонаверинг. Хабарингиз бўлса, қишда жамоадан кўплаб ўйинчилар кетишди, анча ўзгаришлар бўлди. Ўтган йилги таркибдан кимлар қолди? Мен, Санъат Шихов, Суҳроб Неъматов, Муҳиддин Худоёров каби ўйинчилар бу йил ҳам “Бухоро” учун ўйнаяпмиз. Қолган футболчилар эса янги мавсум бошланиши олдидан келишди. Эътибор берган бўлсангиз, мураббийлар ҳам чемпионат бошланишига бир ой вақт қолганда ишга киришишди. Ана шундан сўнг таркиб тузила бошлади. Табиийки, бундай пайтда “Бухоро”нинг олдига қандай қилиб аниқ вазифа қўйиш мумкин? Қолаверса, ўшанда кўпчилик бизга ишонмади. “Бухоро”ни олий лигада қолиш учун курашишини айтишганди. Чунки клубда юз берган ўзгаришлар сабабли жамоага нисбатан ишонч кескин камайиб кетганди. Мана шундай пайтда биз бутун жамоа бўлиб бирлаша олдик. Юқорида айтиб ўтганимдек, Улуғбек Бақоев билан Бахтиёр Ашурматов катта ҳажмдаги ишларни бажаришяпти. Ҳозирда юқори ўринларда бўлишимиз бу бежиз эмас. Биринчи даврада бир қатор ўйинларда очколарни йўқотганимизни ҳам тан оламиз. Агарда бундай ҳолатларга йўл қўймаганимизда ҳозирда “Локомотив”га анча яқинлашиб олган бўлардик.

“Бундай имконият яна қачон бўлади?”
-  Олдинда яна 9 та ўйин турибди. Ҳамма нарса фақат ўз қўлимизда. Биламан, ишқибозларимизнинг биздан умиди жуда катта. Улар ҳар бир ўйинимизда стадионни тўлдириб, жамоани катта иштиёқ билан қўллаб-қувватлашяпти. Бу эса бизга руҳий куч беряпти. Шу боис ғалабаларимизда уларнинг ҳам қўшаётган ҳиссаси катта бўлаётганини алоҳида айтмоқчиман ва бунинг учун уларга миннатдорчилик билдираман. Айниқса, “Бухоро”нинг 2-ўринда бораётгани мухлисларимизни янада руҳлантириб юборди. Ўз навбатида биз ҳам ҳозирги вазиятдаги имкониятни жуда яхши тушуниб турибмиз. Ҳеч ким бундай бўлишини кутмаганди. Ҳатто ўзим ҳам буни ўйламагандим. Лекин кўриб турибсизки, футболда ҳамма нарса бўлиши мумкин. “Бухоро” клуби учун бундай имконият яна қачон бўлади? Шунинг учун биз ҳам мавжуд вазиятдан унумли фойдаланиб қолишга ҳаракат қиляпмиз. Ўз меҳнатларимиз билан юзага келган имкониятни қўлдан чиқариб юборсак ўзимизга ҳам жуда алам қилади. Шунинг учун ҳар бир ўйин жамоамиз учун финал каби катта аҳамият касб этяпти. Шу боис жорий мавсумни иложи борича совриндорлар қаторида якунлашга ҳаракат қиламиз. Ахир бундай имкониятни ўзимиз яратдик, шундай экан, нима учун ундан фойдаланиб қолмаслигимиз керак?

“Локомотив” ҳали чемпион бўлгани йўқ”
-  Тўғри, “Локомотив” клуби анча кучли. Уларнинг бугунги кунда пешқадам бўлиб тургани ҳам бежиз эмас. Лекин бу уларни ҳали чемпион бўлганини англатмайди. Аҳли маррагача вақт бор. Манзилга ким биринчи бўлиб етиб келишини вақт кўрсатади. Агарда мавсум тугашига 3-4 тур қолганида унда катта эҳтимол билан “Локо”ни чемпион бўлишини айтишим мумкин бўларди. Лекин ҳозир бундай дея олмайман. Мисол учун улар Қаршида “Насаф”га ютқазишди. Футболда эса ҳамма нарса бўлиши мумкинлигини барча билади. Яна шуни ҳам қўшимча қилмоқчиманки, бу йилги мавсум анча қизғин руҳда ўтяпти. Интрига анча ошганини ҳамма кўриб турибди. Ҳозирдан бирор нима дейиш қийин. Кўп нарса мавсум охирида ҳал бўлади. Унгача эса яна кўп нарса ўзгариши мумкин.

ФИРДАВСХОН