“Арсенал” январда Навасни харид қилишга уриниб кўради

Fichajes.net нашрининг хабарига кўра, 32 ёшли посбонни жамоага қўшиб олишни шахсан “тўпчилар” устози Унаи Эмери раҳбариятдан сўраган. Шунингдек, ушбу посбонга Италия ва Франция клубларидан ҳам таклифлар бор. Аммо Навас қишки трансфер ойнаси вақтида жамоасини алмаштирмаслиги мумкин. Сабаби 2019 йилнинг январида уни оиласида фарзанд дунёга келиши кутилмоқда. Дарвозабон эса бу вақтда жамоа алмаштиришни истамаслиги мумкин.

Эслатиб ўтамиз, жорий йилнинг ёзида “Реал”га “Челси”дан белгиялик посбон Тибо Куртуа 35 миллион еврога харид қилингач, Навас асосий таркибдан четда қолиб келмоқда.

Навас 2014 йилдан буён қироллик клуби шарафини ҳимоя қилиб келмоқда. Бу вақт ичида у клуб билан Испания чемпиони ва уч марта ЕЧЛда ғолиб чиқишга улгурди.