"Арсенал" форварди "Тоттенхэм"да Кейннинг ўрнини эгаллаши мумкин

Манбанинг хабарига кўра, лондонликлар Балогунни "Бавария" кетган Харри Кейннинг эҳтимолий ўринбосари сифатида кўришмоқда. Аввалроқ, "канонирлар" Балогунни 55 млн еврога сотишга тайёрликларини маълум қилишганди.

Шунингдек, "Тоттенхэм" шорт-листида "Челси"дан Ромелу Лукаку ва "Порту"нинг эронлик ҳужумчиси Меҳди Тареми бор.

Америкалик футболчи ўтган йили ижара асосида "Реймс"да ўйнади. 22 ёшли ҳужумчи барча мусобақаларда 39 та ўйин ўтказиб, 22 та гол урган.

Балогун "Арсенал" тарбияланувчиси саналади. Унинг шартномаси 2025 йилнинг июнигача амал қилади. Футболчига "Интер" даъвогарлик қилмоқда.