АПЛ. Билич Шекспир қаламини синдира оладими? 29-тур превьюси

Туманли албионда 29-тур учрашувларига старт берилади. Турнинг марказий баҳси ҳисобланган "Манчестер Сити" - "Ливерпуль" қарама-қаршилигига бағишланган превьюни эртага ўқишингиз мумкин бўлади. Қуйида эса ана шу турдаги қолган ўйинларга бағишланган превьюни эътиборингизга ҳақола этамиз.

АПЛ, 29-тур
"Вест Бромвич" – "Арсенал"
18.03.2017, 17:30
"Хауторнс"
Бош ҳакам: Нил Суорбрик (Ланкашир)

"Арсенал" Чемпионлар лигасини тарк этди ва энди Англия чемпионатидаги ҳолатини яхшилашга эътибор қаратса ҳам бўлади. "Канонирлар"нинг ЕЧЛ йўлланмалари учун рақобатчилари оддий жамоалар эмас. Жамоа натижа борасида оқсамоқда, лекин бугунги рақибни енгишга кучи этади.

"Вест Бромвич" эса Премьер-лигада қолиш масаласида ҳал этиб бўлди ҳисоб, буёғига Европа лигаси йўлланмаси учун ҳаракат қилиб кўрса бўлади.

Қизиқ:

- "Арсенал" Премьер-лига доирасида "Вест Бромвич"га қарши охирги 12та ўйиндан фақат биттасини ютқазган (9 ғалаба, 2 дуранг, 1 мағлубият);
- "Канонирлар" бугунги рақибига қарши 21та чемпионат ўйинининг барчасида гол урган;
- Жеймс Моррисон "Хауторнс"да "тўпчилар"га қарши кечган охирги учта ўйинда иккита гол урган.



"Кристал Пэлас" – "Уотфорд"
18.03.2017, 20:00
"Селхерст Парк"
Бош ҳакам: Мартин Аткинсон (Лидс)

"Кристал Пэлас" АПЛда охирги бешта ўйиндан учтасини ўз фойдасига ҳал этди ва хавфли зонадан четга чиқди. Сэм Эллардайс "қутқарувчи мутахассис" ролини аъло даражада бажаришда давом этмоқда.

"Уотфорд" учта ўйиндан бери ғалаба нималигини билмаяпти ва бу темпда чемпионатда жон сақлаб қолиш қийин масала. Вальтер Маццари ўзгариш қилиши керак.

Қизиқ:

- Трой Дини "Пэлас"га қарши барча мусобақалардаги сўнгги учта баҳсда 4та гол урган;
- Кристиан Бентеке АПЛда 22та турли клубларга гол урган, лекин "Уотфорд" дарвозасига ҳали йўл топа олмаган;
- Бу мавсум фақатгина "Сандерленд" (31) "Пэлас" ва "Уотфорд" (30)дан кўра кўпроқ футболчилар хизматидан фойдаланган.



"Эвертон" – "Халл Сити"
18.03.2017, 20:00
"Гудисон Парк"
Бош ҳакам: Пол Тирни (Ланкашир)

Ўтган турда "ирислар" еттинчи ўрин учун курашдаги асосий рақиблари "Вест Бромвич"ни 3:0 ҳисобида таслим этишди. Куман шогирдлари уйда жуда кучли жамоага айланишади. Лукаку энг яхши формада, Баркли, Мираллас, Дэвислар ҳам яхши ўйин намойиш этишмоқда.

"Йўлбарслар" олдинги турда "Суонси" устидан жуда муҳим ғалабага эришишди. Лекин, Марко Сильва шогирдлари ҳали хавфли зонадан қочиб улгуришмаган.

Қизиқ:

- "Халл Сити" жамоаси "Эвертон"ни "Гудисон Парк"да 1952 йилдан бери мағлуб эта олмаган. Ўшандан буён "йўлбарслар" ушбу стадиондаги олтита ўйиндан бештасини бой беришган;
- "Халл"нинг ҳозирги таркибида ҳеч бир ўйинчи сафар ўйинларида биттадан ортиқ гол урмаган (бешта футболчи биттадан гол);
- Ромелу Лукаку АПЛнинг бир мавсумида 20та гол урган "Эвертон"нинг биринчи футболчиси бўлиши учун яна битта тўп киритса бас.



"Сток Сити" – "Челси"
18.03.2017, 20:00
"Британниа"
Бош ҳакам: Энтони Тейлор (Манчестер)

"Челси" чемпионлик сари ишонч билан қадам ташлашда давом этмоқда. Конте шогирдлари қатъи ва самарали ўйин кўрсатишмоқда. Бугунги баҳсда ҳам устунлик "аристократлар" томонида.

"Сток Сити" етакчиларга муаммо туғдира оладиган жамоалар сирасига киради. Улар Премьер-лигада 8та ўйиндан бери уй учрашувларини ютқазишмаяпти.

Қизиқ:

- "Сток" АПЛда "Челси"га қарши 17та учрашувдан фақат иккитасида ғалаба қозонган (2 ғалаба, 3 дуранг, 12 мағлубият);
- Фабрегас "Сток Сити"га қарши 8та ўйинда 7 голли пас берган ва иккита гол урган (Асосий таркибда тушганида);
- Антонио Конте бу мавсум барча ўйинчи алмаштириш имкониятларидан фойдаланмоқда (81тадан 81та). 2014-2015 йилги мавсум "Манчестер Сити" барча 114та имкониятдан фойдаланган эди.



"Сандерленд" – "Бернли"
18.03.2017, 20:00
"Стадиум оф Лайт"
Бош ҳакам: Роберт Мэдли (Йоркшир)

"Сандерленд" АПЛда охирги учта ўйинда бирорта ҳам гол урмади. Турнир жадвалида сўнгги поғонани эгаллаб турган клуб учун бу оддий натижадек. Лекин, Мойес жиддий ўзгаришлар қилмаса, кейинги мавсумни Чемпионшипда ўтказиши ҳеч гап эмас.

"Бернли" сафарда жуда ёмон ўйнайдиган жамоа. Бу мавсум меҳмонда бор йўғи 2 очко йиға олган Шон Дайч шогирдлари бу қарама-қаршиликда кичик устунликни мезбонларга бой беришади.

Қизиқ:

- "Бернли" бу мавсум "Сандерленд"га қарши учта ўйинда ҳам ютқазмаган (2 ғалаба, 1 дуранг);
- Жермейн Дефо "Бернли"га қарши ўзининг сўнгги иккита ўйинида гол урган;
- Андрей Грей "Бернли"нинг Премьер-лигада хет-трик қайд этган биринчи футболчиси ҳисобланади. У ўтган йилнинг декабрида айнан "қора мушуклар" билан баҳсда учта гол урган (4:1).



"Вест Хэм" – "Лестер"
18.03.2017, 20:00
"Болейн Граунд"
Бош ҳакам: Роджер Ист (Уилтшир)

Раньери кетганидан кейин "Лестер" фақат ғалаба қозонмоқда. Чемпионлар лигасида чорак финалга чиқиш эса жамоа ўйинчиларига руҳий жиҳатдан катта устунлик бериши аниқ.

"Вест Хэм" эса яхши формада эмас. Клуб тўртта ўйиндан бери ғалаба нималигини билмайди. Ланзини ва Айюлар яхши ўйин кўрсатаётганига қарамай, ҳимоядаги ишлар кўнгилдагидек эмас. Билич бошчилигидаги "болғаурарлар" Шекспирнинг қаламини синдира олишадими ёки йўқ, буни вақт кўрсатади.

Қизиқ:

- "Лестер" жамоаси "Вест Хэм"га қарши охирги тўртта АПЛ ўйинида ютқазмаган (3 ғалаба, 1 дуранг);
- Крейг Шекспир фаолиятини Премьер-лигадаги учта ғалаба билан бошлаган "Лестер"нинг биринчи мураббийига айланиши мумкин.



"Борнмут" – "Суонси"
18.03.2017, 22:30
"Виталити Стэдиум"
Бош ҳакам: Майк Дин (Хесволл)

Хавфли ҳудудга жуда ҳам яқин турган икки клуб тўқнашуви. Жошуа Кингнинг ўтган турдаги хет-трики "Борнмут"га АПЛда 2017 йилдаги илк ғалабани тақдим этди. Уйда самадор ўйин кўрсатадиган мезбонлар бугун кичик устунликка эга бўлишади.

"Оққушлар" эса охирги учта сафар ўйинини бой беришган. Бугун Пол Клемент иккита асосий таркиб ўйинчилари хизматидан фойдалана олмайди. Булар: Кайл Нотон ва Мартин Ольссон. Сигурдссони бор "Суонси"нинг стандарт вазиятлари ҳамиша хавфли кўриниш олади.

Қизиқ:

- "Борнмут" жамоаси "Суонси"га қарши охирги еттита АПЛ ўйинидан олтитасида камида иккитадан гол урган;
- Жошуа Кинг "Суонси"га қарши 3та чемпионат ўйинида учта гол урган;
- Бу мавсум "Суонси" ярим ҳимоячиси Гулфи Сигурдссон АПЛнинг бошқа исталган ўйинчисидан кўра кўпроқ голли пас берди (11та) ва кўпроқ югурди (318,2 км).



"Мидлсбро" – "Манчестер Юнайтед"
19.03.2017, 17:00
"Риверсайд"
Бош ҳакам: Жонатан Мосс (Йоркшир)

"Мидлсбро" икки кун олдин Айтор Каранкани истеъфога чиқарди. Жамоа АПЛда 2016 йилнинг 17 декабридан буён ютмаган. Ана шу вақт мобайнида бор йўғи 4 очко жамғарди ва ўртамиёналар орасидан аутсайдерлар сафига қўшилиб олди.

"Манчестер Юнайтед" Европа лигасида чорак финалга йўл олди. Англия кубогида эса "Челси"га минимал ҳисобда имкониятни бой берди. МЮ бу турдаги рақибини ўзаро баҳсларда таслим этиб келган. Бу сафар Моуриньо Ибрагимович, Руни, Марсьяль, Погба каби ўйинчилар хизматидан фойдалана олмайди. Бу эса унинг ҳужумдаги танловини чеклаб қўяди. Ҳужумда фақат Рэшфорд бор, қанотларга ва ҳужумчи ортига Мхитарян, Мата, Лингард, Янг бор.

Қизиқ:

- "Манчестер Юнайтед" жамоаси "Мидлсбро"га қарши охирги 14та Премьер-лига ўйинининг ҳар бирида гол уришни уддалаган;
- "Қизил иблислар" АПЛ доирасида "Риверсайд" стадионидаги охирги олтита ўйинларидан тўрттасини ўз фойдаларига ҳал этишган (4 ғалаба, 1 дуранг, 1 мағлубият);
- МЮнинг навбатдаги ғалабаси Премьер-лигада 600чи ютуқ бўлади ва улар бу маррани биринчи бўлиб забт этган бўлишади.



"Тоттенхэм" – "Саутгемптон"
19.03.2017, 19:15
"Уайт Харт Лэйн"
Бош ҳакам: Андре Марринер (Бирмингем)

"Тоттенхэм" мавсум якунига жуда яхши формада етиб келди. Лекин, Харри Кейннинг жароҳати ҳужумларни якунлашда кичик муаммоларни туғдириши мумкин. "Шпорлар" бу мавсум уйда ютқазмаган АПЛнинг ягона жамоаси ҳисобланишади.

"Саутгемптон" Маноло Габбиадинини сотиб олгач, ишлари анча юришиб қолди. Ҳужумда Тадич, Рэдмонд ва Габбиадинилар сермаҳсул ўйин намойиш этишмоқда. Лекин, уйда энг хавфли жамоага қарши улардан ғалаба кутиш қийин.

Қизиқ:

- Маурисио Почеттино собиқ жамоаси бўлган "Саутгемптон"га қарши охирги бешта ўйиндан фақат биттасини ютқазган (3 ғалаба, 1 дуранг, 1 мағлубият);
- Деле Алли бу турдаги рақибга қарши сўнгги иккита Премьер-лига ўйинида учта гол урган ва битта пас берган;
- Маноло Габбиадини Премьер-лига тарихида Мик Куин ва Диего Косталардан кейин дастлабки тўртта ўйинда гол урган учинчи футболчига айланиши мумкин.



"Манчестер Сити" – "Ливерпуль"
19.03.2017, 21:30
"Этихад Стэдиум"
Бош ҳакам: Майкл Оливер (Нортумберленд)


Англия Премьер-лигаси турнир жадвали >>> АПЛ


Толибжон Қосимов