"Анхелга айтиб қўйинг, бу ерга қайтмасин, акс ҳолда оила аъзоларидан бири ҳалок бўлади" — Аргентинада Ди Марияга ўлим билан таҳдид қилишди

Мавсум якунланиши арафасида "Бенфика" футболчиси Анхель Ди Мариянинг ўзи улғайган "Росарио Сентраль" клубига қайтиши ҳақида миш-мишлар кўпаймоқда. 

Росарио шаҳри наркотик моддалар савдоси ва жиноятчилик бўйича юқори даражадаги ҳудуд ҳисобланади. Ди Мария ўз баёнотларида гиёҳаванд моддалар савдоси ва зўравонликни бир неча бор қоралаган. Бу эса бир неча ёвуз ниятли кишиларга ёқмаган.

Яқинда унинг ота-онаси истиқомат қиладиган ҳудуд ёнида тўртта ўқ овози эшитилган ҳамда футболчининг отасига жиноятчилар томон шундай мазмундаги хабар келган: "Ўғлингизга айтинг, Росариога қайтмасин, акс ҳолда унинг оила аъзоларидан бири ҳалок бўлади. Ҳатто Максимилиано Пулларо (Санте-Фе губернатори, таҳририят) ҳам сизларни қутқара олмайди. Келаси гал қоғоз эмас, қўрғошин юборамиз".

Эслатиб ўтамиз, 36 ёшли футболчининг Португалия клуби билан шартномаси 30 июнь куни ниҳоясига етади.