Анвар Бердиев: "Уч очко учун чиройли ўйинни қурбон қилишга тайёрман"

- Ўйин ҳақида

- "Олимпик" жамоасини ғалаба билан табриклайман. Бугун биринчи таймнинг ўзида ютқазиб бўлдик, десак ҳам бўлади. Чунки ўйин бошида кам ўйин амалиётига эга футболчиларни майдонга туширгандик, бу ўзини оқламади. Тушуниб етдимки, имконият бериш керак эмас, фақат машғулотда ўзини кўрсатсагина имкон тақдим этиш лозим. Бу нарса менга дарс бўлди. Мухлислардан, жамоа раҳбариятидан узр сўрайман. Бугунги баҳсни тезда унутиб, кейинги ўйинга тайёргарлик кўришимиз керак. Гуруҳдан 2 та жамоа чиқади. Олдимизга қўйилган вазифани бажаришга ҳаракат қиламиз.

- Кубокда жамоа олдига қандай вазифа қўйилган?

- Чемпионат ўйиними, кубок баҳсими, ҳар бир ўйинда ғалаба қозониш вазифаси қўйилган. Ҳозирги асосий вазифамиз – гуруҳдан чиқиш. Қолган учрашувларда ҳам ғалаба учун майдонга тушамиз. 

- "Турон" "Ғиждувон"ни мағлуб этишга эришди, аммо жамоа ўйину у қадар ёрқин эмас. Ўйинни шакллантириб олиш учун яна қанча вақт керак деб ўйлайсиз?

- Ҳозирги вақтда Про лигада ҳар бир баҳс жиддий кечмоқда. Ўйин эсдан чиқиб кетади, аммо натижа тарихда қолади. Асосий мақсадимиз – ҳар битта ўйинда 3 очко олиш. Ўйин ўз-ўзидан шаклланаверади. Яхши ўйнаб, ютқазгандан кўра ёмон ўйнаб, уч очко қўлга киритган афзал. 3 очко учун чиройли ўйинни қурбон қилишга тайёрман.

-  Ўтган йилги жамоа ва ҳозирги "Турон"нинг фарқи хусусида нима дейсиз? Жамоа кучсизлангандек гўё...

- Сиз битта ўйиндан келиб чиқиб шундай фикр билдиряпсиз. "Турон"нинг ўтган йилги ва ҳозирги таркибини кўриб чиқинг. Худога шукрки, "Турон" Про лигада 1-ўринда бормоқда. Мақсадимиз – Суперлигага йўл олиш.