Англия клуби кеча АПЛда гол урган аргентиналик футболчисининг мундиалга боришини истамаяпти

"Брайтон" клуби куни кеча Англия Премьер-лигасидаги илк голини "Ноттингем Форест" дарвозасига урган 18 ёшли ҳужумкор ярим ҳимоячи Факундо Буонаноттенинг Аргентина терма жамоаси сафида 20 ёшгача бўлган ёшлар ўртасидаги Жаҳон чемпионатида иштирок этиш сўровини рад этмоқда. Бу ҳақда тележурналист Пабло Жиралт хабар берди.

Футболчи инглиз клубига январь ойида келиб қўшилганди. Қайд этилишича, терма жамоа бош мураббийи Хавьер Маскерано клуб раҳбарлари ва мураббийлар штаби билан учрашган.

Аргентина таркиб йиғишда қатор муаммоларга дуч келмоқда. Аввалроқ "Манчестер Юнайтед" ўйинчиси Алехандро Гарначо ва "Реал Мадрид" футболчиси Нико Пазнинг мундиалда иштирок этиши сўроқ остида турганлиги ҳақида хабар берилганди.

Эслатиб ўтамиз, Аргентина мезбонлик қиладиган U-20 Жаҳон чемпионатида Маскерано шогирдлари Ўзбекистон билан бир гуруҳдан ўрин олган.