Андрей Микляев: "Чемпионат ана энди чинакамига қизғин тус олади"

- Биз учун бугунги баҳс осон ўтгани йўқ. Жамоамиз охирги ўйинларда очколарни йўқотганди. Шу боис бу ўйин бизга руҳий томонлама қийинроқ кечди. Раҳбарият ҳам жамоамизнинг сўнгги муваффақиятсиз ўйинларидан ранжиган эди. Ўйин олдидан кичик босим мавжуд эди. Ғалаба қозонганимиздан хурсандмиз. Жамоамизнинг жисмоний ҳолати айни пайтда идеал даражада эмас. Футболчиларда чарчоқ аломатлари сезилиб турибди. Кўплаб футболчиларимиз яқинда терма жамоа ихтиёридан қайтишди.

Бобур Йўлдошевнинг қайтиши? Унинг ўйинидан қониқиш хосил қилдим. Ғалати эшитилиши мумкин, аммо бугун майдондаги энг кучга тўла футболчи айнан Йўлдошев бўлди. Йўлдошев ҳимояда нафақат ишончли, балки кутилганидан ҳам яхшироқ ҳаракат қилди. Бобур футболни соғиниб қолгани шундоқ сезилиб қолди.
Бобур Йўлдошев ушбу ўйини орқали асосий таркибдаги исталган ҳимоячига рақобат тақдим эта олишини амалда исботлади.

Бугун жамоамиз энг яхши ўйинини кўрсатмади. Шундай ўйинлар бўладики, дарвозага тепган зарба гол билан якунланаверади. Бугун ошиғимиз олчи бўлди. Баъзан эса кўплаб вазиятлар, зарбалар бўлса ҳам гол кирмайди.
Иккинчи бўлимда биз қарши ҳужумда ўйнашга мажбур бўлдик. Бу ўша жисмоний ҳолатимиз билан боғлиқ. Аслида кўп жамоалар бизга қарши ҳимоядан, қарши ҳужум тактикасида ўйнашади. Бугунги учрашувдаги иккинчи бўлимда аксинча ҳолат руй берди.

Алибоев ва Геворкяннинг жарима зарбаси тепиш борасидаги баҳси? Бу футбол, майдонда футболчилар эмоцияларга берилишади. Жамоамизда жарима зарбаларини амалга ошира оладиган жуда кўплаб маҳоратли ижрочилар бор. Бу вазиятда ҳеч бир жиддий ҳолат кўринмади. Шунчаки Алибоев ҳам жарима зарбасини амалга оширгиси келганди. Геворкян эса тажрибали, ёши катта футболчи. Ўша вазиятда Артур бу ишни ўзи амалга оширишни истади. Ишонтириб айтаман, Геворкян ва Алибоев тортишувларни ёқтирадиган футболчилар сирасига кирмайди. Бу шунчаки ўйинда бўладиган эпизод.

Чемпионатимиз ана энди чинакамига қизийди. Ҳал қилувчи баҳслар, марказий ўйинлар бизни кутмоқда. Буёғига барча беллашувлар биз учун финалдек ўтади. Жамоамизда катта рақобат мавжуд. Шу боис ҳар ўйинда ҳар хил ўзгаришлар руй бериши мумкин.