Андижонда яна бир хусусий футбол клуб фаолиятини бошлади

"Андижон ширингаз сервис" корхонаси раҳбарияти Андижон футбол академияси билан ҳамкорликда,  бевосита ушбу даргоҳ тарбияланувчилари иштирокида профессионал футбол клубини ташкил этди. "Андижон-SGS"  номи билан бу йил Ўзбекистон биринчи лига мусобақасида иштирок этадиган ушбу ёш жамоа бугун Ўзбекистон Coca Cola Кубогининг дастлабки босқичида илк учрашувини ўтказди. 

Тошкент шаҳрида маҳаллий Дўстлик жамоасига қарши кечган баҳсда андижонлик ёш футболчилар учрашувнинг асосий дақиқаларида 1:1 ҳисобида дурангга имзо чекиб,  якунда пенальтилар сериясида 4:3 ҳисобида ғалаба қозонди. 

Маълумот учун, "Андижон-SGS" жамоасига иқтидорли мураббий  Шохруҳ Ишанов бош мураббийлик қилиб келмоқда.  Жамоа ўзагини асосан 2005 йилда туғилган футболчилар ташкил этади. Уларнинг орасида Рауф Инилеев бошқарувидаги Ўзбекистон ўсмирлар терма жамоасига номзод ўйинчиларнинг ҳам борлигини алоҳида эътироф этиш лозим.