Алишер Никимбаев: "ПФЛ ЛаЛиганинг энг абсурд талабини кўчирди"

"Менга ПФЛ (бу қисқартманинг тўлиқ кўриниши қандай бўлмасин) ўзининг мантиқсиз талабларини оқлаш учун етакчи лигалар, масалан, ЛаЛига тажрибасини кўрсатиши ёқади. Ҳа, ҳақиқатдан ҳам Испанияда телетрансляцияга трибуналардаги бўш жойлар тушиб қолса ёки стадион мухлислар билан 70%дан кам тўлса клублар жазоланади. 29 минглик стадионга эга бўлган "Сельта" иккита ўйинда 16 ва 17 минг мухлис йиғгани учун икки марта жаримага тортилган.

Аммо бошқанинг тажрибасини кўр-кўрона кўчиришдан аввал, нега бундай бўлганини тушуниб олиш керак. 2,9 млрд. евролик ТВ шартнома имзолаганидан сўнг телевидения босими остида ЛаЛиганинг шартлари пайдо бўлди. Яъни телевидения Испания учун рекорд суммага битим тузиб, ўз шартларини қўя бошлади. Уларга чиройли кўриниш керак, бош трибуналар эса маҳсулот нархини тушириб юборади.

Ҳар қандай холатда ҳам талаблар телевизион ҳуқуқлар нархи ошишидан сўнг пайдо бўлди. Яъни мантиқли занжир. Шунга қарамай ЛаЛиганинг талабларини жиддий танқид қилишмоқда. Стадион мухлислар билан 70%га тўлдириш Испания учун амаллаб бўладиган вазифа. Бу қоида бизнинг стадионларга тўғри келадими? Сўнгги марта қачон миллий чемпионат ўйинларида "Бунёдкор" стадионининг ҳеч бўлмаса ярми тўлган? "Пахтакор" ҳар бир уй учрашувида 23 минг мухлис тўплай олиши ҳақиқатга тўғри келадими? Пахта мавсуми бошланса вилоятлар жамоалари нима қилади?

Саволлар кўп. Яна биттасини қўшишим мумкин. Нега ПФЛ ЛаЛиганинг энг абсурд талабини кўчириб, ишдаги энг муҳимини ўрганмайди, масалан, чемпионат иштирокчилари сонини бир ой олдин аниқлаш. Клубларга эса чет эл тажрибасига эътибор қаратишни маслаҳат бера оламан холос. Россиянинг бир клуби бўш трибуналарни шундай тўлдирди" - деб ёзди Никимбаев ўзининг Телеграм каналида.