Алишер Никимбаев ҳам кун мавзусига муносабат билдирди

Маълумки, кеча Суперлига 23-тур доирасида "Локомотив" - АГМК учрашуви ўтказилди ва бунда "темирйўлчилар" 2:1 ҳисобида зафар қучишди. Ўйиндан олдин ҳаво совуқ бўлгани учун "Локо" футболчилари шортик остидан ички кийим (гамаш) кийиб майдонга тушишни мақсад қилишди, албатта танани иссиқ тутиши учун. 

Бироқ ички кийим (гамаш) қора рангда бўлгани учун учрашув комиссари Сардор Қудратуллаев билан ҳакамлар назоратчиси Маъмур Саидқосимов футболчиларга гамаш кийишга рухсат бермади. Негаки футболчилар шортиги қизил рангда эди. Аброр Пирриев мана шу масалани кўтариб, аввало соғлик бирламчи эканини назарда тутиб фикр билдирди. 

Кейинчалик унинг фикрига ПФЛ расмий сайти муносабат билдирди. Шунингдек, сайтимиз ходими Маъмур Саидқосимовдан интервью олиб, унинг фикрини чоп этди.

Бугунги кунда Қатарда фаолият олиб бораётган Алишер Никимбаевни ҳам ушбу мавзу бефарқ қолдирмади ва таниқли мутахассис ўз телеграм каналида фикр қолдирди. 

Хусусан Алишер Никимбаев шундай ёзган: "Шифокор Аброр Пирриев футболчиларнинг қўшимча экипировкаси қандай рангда бўлиши ҳақида яхши мавзуни кўтарди. Унга ПФЛ ва кечаги ўйин назоратчиси оперативлик билан жавоб қайтарди. Улар бу ўринда ўйин қоидаларини ёдга олиб, ички кийим шортик билан бир хил рангда бўлиши эканлигига урғу қаратишган". 

"Фақат шу ўринда яна бир жиҳатга эътибор қаратиш керакки, ўйин қоидаларига кўра дарвозабонлар формаси ҳам ҳакамлар ва майдондаги бошқа футболчилар формасидан фарқ қилиши талаб этилади. Агар дарвозабонда бошқа форма бўлмаса уни алмаштирмаслиги мумкин. Кечаги ўйинда эса ҳар икки жамоа дарвозабонлари, шунингдек ҳакамлар ҳам қора рангли либосларда ҳаракат қилишди. Бундан кўриниб турибдики, кечаги ўйин пайтида на "Локомотив" дарвозабони, на АГМК посбони ва на ҳакамлар бригасида қора формадан бошқаси бўлмаган".