Алибобо Раҳматуллаев: “Ғалаба қозонишимиз шарт эди”

Захирадан майдонга тушган Раҳматуллаев мезбонлар дарвозасига иккинчи голни уришга эришди. Айнан шу гол якунда муҳим аҳамиятга эгалиги билан ёдда қолди:

- Барчага маълумки, кубок учрашувларида ҳар қандай жамоа ҳам муносиб тарзда тайёргарлик кўриб ижобий натижани қайд этиш учун ҳаракат қилади. “Цементчи” жамоаси ҳам кубокдаги ажойиб ўйинлари билан мухлисларни хурсанд қилишга интилиб келади. Мисол учун қувасойликлар ўтган йили “Олмалиқ” ва “Машъал” клубларини мағлуб этиб чорак финал йўл олиб, “Пахтакор” билан ўз майдонида дуранг ўйнаганди. Айнан шу нуқтаи назардан олиб қараганда “Цементчи” билан ўтадиган ўйинни қийин бўлишини билардик. Майдон эгалари майдонда яхши ўйин намойиш этишди.

Жамоамиз чемпионатнинг дастлабки икки турида ғалаба қозонмаганлиги сабабли, Қувасойдан ижобий натижа билан қайтишимиз шарт эди. Шу сабабли, баҳсга муносиб тарзда ҳозирлик кўргандик. Майдонда бор кучимиз билан тўп суриб, якунда ютуқни қўлга киритдик. Бу орқали клуб раҳбарияти ва мухлисларимиз олдида юзимиз ёруғ бўлди, - дейди Раҳматуллаев.